ءابىش كەكىلبايەۆتىڭ مەرەيتويى جوعارى دەڭگەيدە اتالىپ وتىلەدى
«تۇركىسوي دەگەن ۇلكەن ۇيىم بار، سوعان ۇلكەن ۇسىنىس ەنگىزگەن ەدىك. ياعني، 2019 -جىلدى ءابىش اعامىزدىڭ جىلى دەپ جاريالاۋ جونىندە ۇسىنىس جولدادىق. وندا دۇيسەن قاسەيىن ۇلى دەگەن ازامات بار. ول جاقتان ۇلكەن قولداۋ تابىلىپ جاتىر. بۇل ۇلكەن ءىس- شارانىڭ ءبىرى عانا. سونىمەن قاتار ءابىش اعا اتىنداعى ۇلكەن رۋحاني ورتالىق سالۋدى قولعا الدىق»، - دەدى ماڭعىستاۋ اكىمى.
ونىڭ ايتۋىنشا، ورتالىق قۇرىلىسى اعىمداعى جىلى باستالىپ، كەلەر جىلى تولىعىمەن اياقتالاتىن بولادى.
«ونىڭ ىشىندە ءابىش اعانىڭ مۋزەيى بولادى، ارنايى ەسكەرتكىشى ورناتىلادى. ەسكەرتكىش مەملەكەت باسشىسىنىڭ تاپسىرماسىمەن دايىندالۋدا. ونى بولاشاقتا وزدەرىڭىز كورەسىزدەر. مۇنان بولەك، «ءابىش وقۋلارى» بايقاۋى باستالىپ كەتتى. كەلەسى جىلى ونى حالىقارالىق دەڭگەيدە وتكىزەمىز. ءابىش اعامىز تۋعان وڭدى اۋىلىنا ونىڭ ەسىمىن بەرۋ تۋرالى ۇسىنىس جاسالدى. ونىڭ تولىق قولداۋ تاباتىنىنا سەنىمدىمىن. بولاشاقتا «ءابىش الەمى» اتىنداعى حالىقارالىق تەاترلار فەستيۆالىن دە وتكىزەمىز. بۇل تەك باستاماسى عانا، قالعان اقپاراتتاردى الداعى ۋاقىتتا ب ا ق بەتتەرىنەن كورەرسىزدەر»، - دەدى ەرالى توعجانوۆ.
سونداي- اق ءوڭىر باسشىسى قالامگەردىڭ 25 تومدىق شىعارمالار جيناعى شىعارىلىپ، ءابىش كەكىلبايەۆقا ارنالعان ەنتسيكلوپەديا 5 مىڭ دانامەن جارىق كورەتىندىگىن ايتتى.
ايتا كەتەيىك، شارا بارىسىندا ەرالى توعجانوۆ قازاق، ورىس، اعىلشىن، قىتاي تىلىندە 1 مىڭ دانامەن جارىق كورگەن «ماڭعىستاۋ اڭىزدارى» اتتى كىتاپتى تانىستىردى.
سونىمەن قاتار ول 2025 -جىلى ءاربىر ماڭعىستاۋلىقتى 30 شارشى مەتر باسپانامەن قامتاماسىز ەتۋگە ۋادە بەردى.
اۆتور: مارلان جيەمباي
