كەش جاتىپ، كەش تۇراتىن ادامداردا ەرتە ءولىپ كەتۋ قاۋپى جوعارى

 استانا. قازاقپارات - انگليا ۋنيۆەرسيتەتىنىڭ عالىمدارى كەش جاتىپ، كەش تۇراتىن ادامداردا ۋاقىتىنان بۇرىن ءولىپ كەتۋ قاۋپى جوعارى ەكەنىن انىقتادى.

كەش جاتىپ، كەش تۇراتىن ادامداردا ەرتە ءولىپ كەتۋ قاۋپى جوعارى

زەرتتەۋ ناتيجەسى MedicalXpress تە جاريالاندى، دەپ حابارلايدى Stan.kz اقپاراتتىق اگەنتتىگى.

زەرتتەۋگە 38 بەن 73 جاس ارالىعىنداعى 433 مىڭ ادام قاتىستى. عالىمدار ولاردى ءتورت توپقا ءبولدى. ەرىكتىلەردىڭ دەنساۋلىعىن عالىمدار 6,5  جىل بويى باقىلاۋدا ۇستادى.

ناتيجەسىندە كەش جاتاتىن «جاپالاقتاردا» ەرتە تۇراتىن «بوزتورعايلارعا» قاراعاندا ەرتە ءولىپ كەتۋ قاۋپى %10 عا جوعارى ەكەنى انىقتالدى. ونىڭ سەبەبى ءارتۇرلى بولۋى مۇمكىن. كەش جاتىپ، كەش وياناتىن ادامدار جۇرەك- قان تامىرلارى، ديابەت، پسيحولوگيالىق جانە جۇيكە اۋرۋلارىنا ءجيى ۇشىرايدى ەكەن.

عالىمداردىڭ سوزىنشە، ادام حرونوتيپىنىڭ گەننەن بەرىلەتىنى انىقتالسا، «جاپالاقتارعا» كۇندەلىكتى كۇن ءتارتىبىن اۋىستىرعانى ءجون. جۇمىس تارتىبىنە ساي كەش جاتىپ، كەش تۇرۋعا ءماجبۇر بولاتىن ادامدار كۇيزەلىسكە دە ءجيى تاپ بولاتىن كورىنەدى.