بۇگىن قىزىلجاردا قىس بويى جاۋماعان قار ءتۇستى

 استانا. قازاقپارات - قىزىلجاردى ءبىر تۇندە قار باسىپ قالدى. سينوپتيكتەر بۇگىنگى قار ون كۇندىك جاۋىن- شاشىن كولەمىنىڭ مولشەرىنە تەڭ ەكەنىن ايتىپ وتىر.

وسىدان بىرەر كۇن بۇرىن پەتروپاۆلدا اۋا تەمپەراتۋراسى+ C 12 گە دەيىن جىلىنعان ەدى. جىلى كيىمدەرىن جيىپ، كولىكتەرىنىڭ دوڭگەلەكتەرىن جازعىعا اۋىستىرىپ ۇلگەرگەن قالا تۇرعىندارى ءۇشىن قالىڭ قاردىڭ ءتۇسۋى كۇتپەگەن جاعداي بولدى.

«قاردىڭ باسىم بولىگى ەرىپ كەتكەندىكتەن، دەمالىس كۇنى كولىگىمنىڭ دوڭگەلەگىن اۋىستىرىپ تاستادىم. تاڭەرتەڭ تۇرسام، قىس قايتادان كەلىپ قالىپتى. بالامدى باقشاعا قوعامدىق كولىكپەن اپارىپ، ءوزىم جۇمىسقا جاياۋ كەلدىم. ەندى كوكتايعاق باسىلعانشا كولىكتى قويا تۇرۋعا تۋرا كەلەتىن سىڭايلى» ، - دەيدى پەتروپاۆل قالاسىنىڭ تۇرعىنى ايبەك جۇكەنوۆ.

قالىڭ قار كوممۋنالدىق قىزمەتتەردى دە ابىگەرگە سالدى. تاڭنىڭ اتىسىمەن كوشەگە ارنايى تەحنيكا شىعارىلدى.

«تاڭەرتەڭ تەرەزەدەن قاراسام، قار جاۋىپتى. دالاعا شىعىپ، ونىڭ قالىڭدىعىنا تاڭ قالدىم. كولىگىمدى اق ۇلپادان ارشىپ الۋ ءۇشىن ءبىراز اۋرەلەندىم. قالىڭ قاردىڭ اسەرىنەن ماشينا باتىپ تا قالدى. كورشىلەر كولىكتى يتەرىپ، اۋلادان شىعارىپ جىبەردى» ، - دەيدى سامات ءجۇسىپوۆ.

ءبىر تۇندە سولتۇستىك قازاقستان وبلىسىنىڭ اۋماعىندا تۇسكەن قاردىڭ مولشەرى 2-11 ميلليمەتر ارالىعىندا. بۇل ونكۇندىك جاۋىن- شاشىن مولشەرىنە تەڭ.

«ءساۋىر كوكتەمنىڭ جاز مەزگىلىنە اۋىساتىن ايى بولىپ ەسەپتەلەدى، سوندىقتان وعان قۇبىلمالى مىنەز ءتان. سولتۇستىك قازاقستان ءۇشىن ساۋىردە قاردىڭ ءتۇسۋى - قالىپتى جاعداي بولىپ سانالادى. ەرتەڭ كۇن اشىق بولادى. 16 سى تاعى دا جاۋىن- شاشىن ءتۇسۋى مۇمكىن. جالپى ەكىنشى ونكۇندىكتىڭ سوڭىنا دەيىن قار ارالاس جاڭبىر جاۋادى دەپ بولجاپ وتىرمىز. بۇل كۇندەرى جەلدىڭ ەكپىنى دە كۇشەيەدى» ، - دەيدى «قازگيدرومەت» ر م م سقو بويىنشا فيليالىنىڭ ءبولىم باسشىسى گۇلزات عازيزوۆا.

سولتۇستىك قازاقستان تاريحىندا ەڭ سۋىق ءساۋىر 1963 -جىلى تىركەلگەن. ايدىڭ 1- كۇنى اۋا تەمپەراتۋراسى - C26,4 كورسەتكەن. ال ەڭ ىستىق كۇن 1982 -جىلى 30- ساۋىردە بولعان. بۇل كۇنى تەرمومەتر +°C31 گە دەيىن كوتەرىلگەن.

Baq.kz