ەكونوميكاسى تۋريزمگە بارىنشا تاۋەلدى ەلدەر

استانا. قازاقپارات - بۇگىندە مۇنايعا تاۋەلدى ەلدەردى ەكىنىڭ ءبىرى بىلەدى دەسەك، ارتىق ايتپاسپىز.

قازىناسى مۇنايدان تۇسكەن تابىستىڭ مولشەرىنە قاراي تولىپ نەمەسە ورتايىپ وتىراتىن ەلدەردىڭ ءوزى ءبىرسىپىرا. ولاردىڭ قاتارىندا قازاقستان دا بار. مۇنايعا تاۋەلدىلىكىتەن قۇتىلۋ ءۇشىن ەكونوميكاسىن ءارتاراپتاندىرۋعا كۇش سالىپ، ءتۇرلى رەفورمالاردى قولعا الىپ جاتقان ەلدەردىڭ قاتارىندا «بىرەۋدەن ىلگەرى، بىرەۋدەن كەيىن» كەلەمىز.

دەسە دە الەمدە بىزدەگى سەكىلدى قۇداي بەرە سالعان قازبا بايلىعى مەن شيكىزاتى جوق ەلدەردىڭ كەيبىرى تۋريزم سالاسىنان تۇسكەن قارجىمەن-اق جان باعىپ وتىرعانىن ايتا كەتپەسكە بولمايدى.

ونداي ەلدەردىڭ قاراسى دا ارتىپ كەلەدى. تۋريزم ەكونوميكانىڭ جەڭىل سەكتورى دەسەك، قاتەلەسپەيمىز. زاۋىت سالىپ، كاسىپورىن اشىپ جاتپايسىز، ءوندىرىس دەپ، وتكىزۋ دەپ، باس قاتىرىپ جاتپايسىز. تۋريستەرگە بارىنشا جاعداي جاساساڭىز، جەتكىلىكتى.

دەسە دە وسىنىڭ وزىنە قول جەتكىزە الماي وتىرمىز. سونىمەن ۇلتتىق ەكونوميكاسى تۋريزم سالاسىنا ەڭ تاۋەلدى ەل قاي ەل؟ تۋريزم جانە ساياحات جونىندەگى بۇكىل الەمدىك كەڭەستىڭ (WTTC) ساراپشىلارى مالديۆتى(مالديۆ رەسپۋبليكاسى) بۇل ءتىزىمنىڭ باسىنا شىعارىپتى.

وتكەن جىلدىڭ قورىتىندىسى بويىنشا اتالعان ەلدىڭ جالپى ىشكى ونىمىندەگى

تۋريزم ۇلەسى %39,6 دى قۇراعان. ەكىنشى ورىنعا تابان تىرەگەن سەيشەل ارالدارىندا بۇل كورسەتكىش - %26,4، باگام ارالدارىندا - %19، سەنت-ليۋسي - %15.

ال ەۋروپادا تۋريزمگە ەڭ تاۋەلدى ەل مالتا ەكەن. جالپى ىشكى ونىمگە شاققاندا تۋريزمنەن تۇسكەن تابىس %14,2 دى قۇراعان. ودان كەيىنگى ورىنعا چەرنوگوريا (%11) مەن حورۆاتيا (%10,9) جايعاسقان. تۋريزمگە ەكونوميكاسى تاۋەلدى العاشقى ون ەلدىڭ قۇرامىندا كونگو، وزبەكستان، مولدوۆا، ت. ب. بار.