الماتى وبلىسىنداعى اۋىلدىق مەكتەپتەن جىلاندار شىقتى - فوتو

تالدىقورعان. قازاقپارات - الماتى وبلىسىنداعى الاكول اۋدانىنا قاراستى اقتۇبەك اۋىلىنداعى مەكتەپتەن شىققان جىلاندار مەكەمە قىزمەتكەرلەردىڭ زارەسىن ۇشىردى، دەپ حابارلايدى قازاقپارات ءتىلشىسى.

قازىر اقتۇبەك ورتا مەكتەبىندە 206 وقۋشى مەن 40 ءبۇلدىرشىن تاربيەلەنىپ جاتىر.

جىلاندار ءبىرىنشى قاباتتاعى كىشكەنتاي بالالار ورنالاسقان ورتالىقتاعى بولمەدەن شىققان. مەكتەپ جانىنداعى شاعىن ورتالىقتا ىستەيتىن اينۇر تۇراروۆانىڭ ايتۋىنشا، جىلان قىزمەتكەرگە قاراي شاپشىعان.

 

«كادىمگىدەي ءىسىنىپ تۋرا قاسىما كەلدى. ءبىر سەكۋند بولماعاندا شاعاتىن ەدى. ءبىز ۇلكەنبىز قاشىپ ۇلگەرەرمىز، بالالارعا قيىن عوي»، - دەيدى اينۇر تۇراروۆا.

اقتۇبەك ورتا مەكتەبىنىڭ ديرەكتورى وسى جايتتان كەيىن 40 بالانى ەكىنشى قاباتقا كوشىرگەن. سونداي-اق، اتا-انالار ەندى بالالارىن مەكتەپكە جىبەرۋگە قورقىپ وتىر.

 

«وسى بولمەنى ءسۇرتىپ جاتقان كەزدە جىلاننىڭ قۇيرىعى قولىما ورالدى. قايتا باسى ەمەس، شوشىنعانىم سونشا، قان قىسىمىم كوتەرىلىپ، ارىپتەستەرىمنىڭ قاسىنا جۇگىرىپ باردىم. بۇل سۇمدىق جاعداي. ءتۇرلى جىلاندار شىعادى. قاراسى، جاسىلى بار»، - دەيدى قىزمەتكەردىڭ ءبىرى كۇلمارحان قاليەۆا.

سۇمدىق جايتتان كەيىن بىردەن عيماراتتىڭ ەدەندەرى اشىلىپ، جىلان مەكەن ەتەتىن جەرلەرگە ارنايى اپپارات قويىلعان، قازىر قۇرىلعىلار قوسۋلى تۇر.

 

«ءبىز ينتەرنەتتەن جىلاندارعا قارسى ارنايى قۇرىلعى ساتىپ الىپ، ورناتتىق. قاۋىپسىزدىك رەتىندە كىشكەنە بالالاردى ەكىنشى قاباتقا كوشىرىپ الدىق. ال ءوزىم بۇل مەكتەپتە ديرەكتور بولىپ قىركۇيەك ايىنان باستاپ ىستەپ جاتىرمىن. ءبىراق جىلاندى ءوز كوزىممەن كورمەدىم»، - دەيدى اقتۇبەك ورتا مەكتەبىنىڭ ديرەكتورى گۇلنار تايكەنوۆا.

اقتۇبەك اۋىلدىق وكرۋگىنىڭ اكىمى قايرات تۇرلىبەكوۆ تە جىلاندى ءوز كوزىمەن كورمەگەنىن ايتادى.

 

«جىلان كەلگەن شىعار. ەندى اقىلداسىپ، كۇردەلى جوندەۋ وتكىزەتىن بولساق، ەدەندەردىڭ ءبارى جابىلاتىن بولسا، سول كەزدە بۇل تىرشىلىك يەلەرى كەتەتىن شىعار دەپ ويلايمىن»، - دەيدى ق. تۇرلىبەكوۆ.

تۇرعىندار مەكتەپتىڭ ىشىندە جىلاننىڭ ورداسى بار دەپ ۇرەيلەنەدى. سەبەبى مەكتەپتەن جىلاننىڭ شىققانىنا 10 جىلدان استام ۋاقىت بولعان.