نۇرسۇلتان نازاربايەۆ جەمقورلىقتىڭ قايدان باستالاتىنىن ايتتى
مەملەكەت باسشىسى نۇرسۇلتان نازاربايەۆ كەيبىر كىتاپتاردىڭ تيىمدىلىگىن ەرەكشە اتاپ ءوتتى، دەپ حابارلايدى قازاقپارات ءتىلشىسى.
«ريككي گريفيننىڭ «مەنەدجمەنت» اتتى كىتابى مەملەكەتتىك سەكتور ءۇشىن دە، جەكە سەكتور ءۇشىن دە اسا ماڭىزدى. ماسەلەنىڭ ءبارى مەنەدجمەنتتە جاتىر. ءبىز جەكەشەلەندىرۋدى نە ءۇشىن باستادىق؟ سەبەبى مەملەكەت جاقسى مەنەدجەر ەمەس، باسقارا المايدى. ال مەملەكەتتىك قاراجات بولعاننان كەيىن مەنىكى دە ەمەس، ونىكى دە ەمەس. سودان جەمقورلىق تا، ۇرلاۋ دا شىعادى. ەگەر ءوندىرىس مەنىكى بولسا، وندا مەن ونى پايدالى قىلۋعا، تابىس تابۋعا، ءوزىمدى وسىرۋگە تىرىسامىن عوي. سوندىقتان مەنەدجمەنت - قازىر وتە كەرەك نارسە»، - دەدى ن. نازاربايەۆ بۇگىن «100 جاڭا وقۋلىقتىڭ» العاشقى سەرياسىن تانىستىرۋ راسىمىندە.
مەملەكەت باسشىسىنىڭ ايتۋىنشا، بۇگىندە جەكەشەلەندىرۋدىڭ ەكىنشى كەزەڭى اياسىندا مەملەكەتتىڭ قاراماعىنداعى وندىرىستەر جەكەمەنشىككە ساتىلىپ جاتىر. سونىڭ ارقاسىندا اتالعان كاسىپورىنداردىڭ تيىمدىلىگى ارتادى دەگەن سەنىم بار. ال مەملەكەتتىڭ مىندەتى باسقا.
بۇدان بولەك، ەلباسى كاسىپكەرلىكتى دامىتۋعا ارنالعان كىتاپتاردىڭ تيىمدىلىگىن دە ەرەكشە اتاپ ءوتتى. «دونالد كۋراتكونىڭ «كاسىپكەرلىك» اتتى كىتابىندا بيزنەستى تابىستى دامىتۋ تۋرالى جۇزدەگەن مىسال بار. بىزدە بيزنەسپەن شۇعىلدانىپ جاتقان ازاماتتارىمىز وسىنى وقىدى ما، جوق پا؟ ءاي، قايدام، ايتەۋىر بىلەتىنىن جاساپ جاتىر. «كاسىپكەر - مۇمكىندىكتەدى كورە بىلەتىن، قابىلداي الاتىن، ونى نارىقتىق يدەياعا اينالدىرىپ، سونى ىسكە اسىرا الاتىن تۇلعا» دەيدى اۆتور. وسىنداي تۇلعا بولعىسى كەلەتىن ءبىزدىڭ جاستارىمىز ءۇشىن بۇل كىتاپ قۇندى جولباسشى بولا الادى دەپ سەنەمىن، - دەدى ن. نازاربايەۆ.
ايتا كەتەيىك، بۇگىن اتالعان كىتاپتاردىڭ بارلىعى پرەزيدەنتكە تانىستىرىلدى. سول كەزدە مەملەكەت باسشىسى ءدىني ءبىلىمنىڭ ماڭىزدىلىعىنا دا ەرەكشە توقتالدى.
