اۋدارىلعان وقۋلىقتار بيىل ءبىلىم باعدارلاماسىنا ەنگىزىلسىن - ەلباسى
بۇل تۋرالى بۇگىن اتالعان جوبا اياسىندا جارىق كورگەن كىتاپتاردىڭ تانىستىرىلىمىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«100 جاڭا وقۋلىق» جوباسى بويىنشا ۇكىمەت ۇلتتىق اۋدارما بيۋروسىنا ءبىرقاتار ناقتى تاپسىرما بەرۋى قاجەت. بىرىنشىدەن 2018-جىلعا بەكىتىلەتىن 30 كىتاپتى ساپالى اۋدارىپ، باسىپ شىعارۋ كەرەك. اۋدارماشىلارعا جۇمىس تولىپ جاتىر. وعان قارجىنى ۋاقتىلى ءبولىنىپ، ودان كەيىنگى جىلداردا قولعا الىناتىن وقۋلىقتار دەر كەزىندە بەكىتىلىپ ساراپتالۋى كەرەك»، - دەدى ەلباسى.
ەكىنشىدەن، مەملەكەت باسشىسى بۇل وقۋلىقتاردى ءبىلىم جۇيەسىنە ءتيىمدى ەنگىزۋ ەڭ ماڭىزدى مىندەت بولاتىندىعىن ايتتى.
«جاستار ولاردى بىردەن-بىردەن وقي باستاۋى قاجەت. الداعى وقۋ جىلىنان باستاپ وسى وقۋلىقتارمەن وقىتىلاتىن پاندەر ءبىلىم بەرۋ باعدارلاماسىنا ەنگىزىلسىن. ۇشىنشىدەن، قولدانىسقا ەنگەن تەرميندەردى جيناقتاپ، گۋمانيتارلىق-ەكونوميكالىق لەكسيكانىڭ تۇسىندىرمە سوزدىگىن شىعارۋدى جۇكتەيمىن»، - دەدى ق ر پرەزيدەنتى.
ەلباسى تورتىنشىدەن، وقۋلىقتاردى كادىمگى كىتاپ تۇرىندە شىعارۋمەن قاتار سيفرلىق نەگىزدە، ونلاين ءبىلىم بەرۋدى دامىتۋعا ءتيىس ەكەندىگىمىزدى باسا ايتتى.
«قازاقستاننىڭ اشىق ۋنيۆەرسيتەتى جان-جاقتى قولداۋعا يە بولۋى كەرەك. وقۋلىقتاردىڭ نەگىزىندە دايىندالاتىن اشىق لەكتسيالار ۆيدەوتەكاسىنىڭ ساپاسىنا باسا ءمان بەرۋ. بەسىنشى، «100 جاڭا وقۋلىق» جوباسى عىلىمي اۋدارما مەكتەبىن دامىتۋ ءۇشىن اسا ماڭىزدى. بۇل ءالى دە بولاشاقتا بىزگە كەرەك بولادى. سوندىقتان اۋدارمالار اياسىنداعى تاجىريبە، بىلىك، كاسىبي داعدىلاردى جۇيەلەپ، دامىتا ءتۇسۋ قاجەت. وسىنىڭ ءبارىن ساپالى ىسكە اسىرۋعا ءبىلىم جانە عىلىم مينيسترلىگى جاۋاپتى، ال جالپى جۇمىستى ۇيلەستىرۋدى ۇكىمەتكە تاپسىرامىن»، - دەدى نۇرسۇلتان نازاربايەۆ.
