الماتى اكىمى زەينەتكەرلەرگە اقشا تابۋدىڭ قىزىق جولىن ۇسىندى

استانا. قازاقپارات - قارتتار بالا قاراسىن. الماتى اكىمى زەينەتكەرلەرگە ۇيلەرىندە بۇلدىرشىندەردى باعىپ، اقشا تابۋدى ۇسىندى.

وسىلايشا، اتا-انالار الىسقا بارماي-اق بالالارىن ەگدە كىسىلەرگە بەرسە ۋاقىت تا، اقشا دا ۇنەم بولادى دەيدى باۋىرجان بايبەك. اكىمدىك ءتىپتى ۇزاق ءومىر كارتاسىن دايىنداعان. ول بويىنشا زەينەت جاسىنداعى ادامداردى جاي وتىرعىزباي، قوعام ومىرىنە ارالاستىرۋدى كوزدەپ وتىر. بۇل تۋرالى ك ت ك حابارلادى.

بايبەكتىڭ زەينەتكەر قارتتار قوسىمشا اقشا السىن دەگەن بۇل جولعى باستاماسىن تۇرعىندار قالاي قابىلداۋى مۇمكىن؟! اكىمنىڭ ءوزى سەنىمدى. كۇن ۇزاق ۇيدە تەلەديدارعا تەلمىرمەي، بىرەۋدىڭ بالاسىن اقشاعا قاراسا وزىنە دە، وزگەگە دە ءتيىمدى دەيدى ول.

«جۇمىس ورنى بولادى. زەينەتكەرلەر قوسىمشا ايلىق الادى. اتا-انالارعا دا جاقسى عوي، كورشى ۇيگە اپارا سالادى. ءبىز وسى جۇمىستى رەتتەپ، ارنايى سەرتيفيكاتتار بەرەمىز. سوسىن قاي ۇيلەردە قارتتار قارايتىنى تۋرالى ارنايى ءتىزىمدى جاريالايمىز. قازىر جالعىز تۇراتىن زەينەتكەرلەر وتە كوپ»، - دەيدى الماتى قالاسىنىڭ اكىمى باۋىرجان بايبەك.

دەگەنمەن، باستامانى ءبارى قولداي قويۋى ەكىتالاي. ويتكەنى، الماتىدا 222 مىڭعا جۋىق ەگدە كىسىنىڭ تەك 6 پايىزى عانا بەلسەندى توپقا جاتادى. قالعاندارى قارتتىق عۇمىرعا مويىنسۇنعان، نەمەرەسىن باعىپ نەمەسە اۋرۋ-سىرقاۋمەن الىسىپ جۇرگەندەردىڭ قاتارىندا. ايتسە دە باۋىرجان بايبەك ءبىر وقپەن ەكى قوياندى اتۋدى كوزدەگەندەي. بىرىنشىدەن، بالاباقشاداعى ورىن تاپشىلىعى ازايسا، ەكىنشىدەن ونىڭ قۇرىلىسىنا بولىنەتىن اقشانى ۇنەمدەمەك.

بۇل- بەلسەندى ۇزاق ءومىر كارتاسى اياسىنداعى باستامانىڭ تەك بىرەۋى عانا.

اكىمدىك الماتىدا باستاپقىدا قىرىق شاقتى الەۋمەتتىك كلۋب اشپاق. وندا زەينەتكەرلەر ءتۇرلى ويىندارمەن ۋاقىت وتكىزىپ، تىپتەن، يوگا، اەروبيكامەن اينالىسا الادى. قوعامدىق كەڭەسكە جينالعانداردىڭ ءبارى بۇل ۇسىنىستى ءبىر اۋىزدان قولداپ شىعا كەلدى.

زەينەتكەردىڭ ءوزى زامانعا ساي بولۋى ءتيىس. قالا اكىمى باۋىرجان بايبەك قارتتارعا اعىلشىن ءتىلىن ۇيرەتىپ، كومپيۋتەردى قولدانۋداعى ساۋاتتىلىعىن دا ارتتىرماق. سونىمەن قاتار، بۇگىنگى جيىندا ata-apa.kz ينتەرنەت-پورتالىن اشۋ تۋرالى ۇسىنىس ءتۇستى. اينالىپ كەلگەندە بۇل شارالاردىڭ باعدارلامانىڭ و باستا كوزدەگەن ءومىردى ۇزاتۋ ميسسياسىنا قانشالىقتى سەپتىگى تيەتىنىن كەسىپ ايتۋ قيىن. قيت ەتسە باتىستىڭ باستاماسىن العا تارتاتىن اتقامىنەرلەر، وسى ورايدا ءبىزدىڭ زەينەتكەرلەردەگى ۇلتتىق مەنتاليتەتتى ەسەپكە الماعانداي.