سۋىققا ءتوزىمدى بيداي ءتۇرى الىنباق
«استانا - جاڭا باستامالار سەرپىنى» عىلىمي جاستار فورۋمى اياسىنداعى كورمە گەوگرافيالىق اقپاراتتىق جۇيەلەر تەحنولوگيالارى جانە اگرارلىق- ونەركاسىپتىك كەشەننىڭ سيفرلاندىرۋ، اكۆامادەنيەت، ۆەتەريناريا، اۋىلشارۋاشىلىق بيوتەحنولوگياسى، وسىمدىك شارۋاشىلىعى، اۋىل شارۋاشىلىعى تەحنيكاسى باعىتتارى بويىنشا وتكىزىلدى. كورمەگە جاس عالىمدار تاراپىنان ازىرلەنگەن ەڭ ۇزدىك 20 جوبا تاڭدالدى.
سونىڭ ءبىرى - نورماتيۆتىك- تەحنيكالىق قۇجاتتارى ازىرلەنىپ، زەرتحانالىق سىناقتان وتكىزىلگەن يتتەردىڭ ەحينوكوككوزىن انىقتاۋعا ارنالعان كوپرو- يممۋنوفەرمەنتتىك تالداۋ جيىنتىعى.
«ءبىز جاس ماماندار مەن ستۋدەنتتەردەن قۇرالعان ۇجىممەن جاسالعان جوبانى اكەلىپ وتىرمىز. ءبىزدىڭ نەگىزگى باعىتىمىز - ادامدار مەن جانۋارلاردىڭ جۇقپالى اۋرۋلارىن انىقتاۋعا ارنالعان تەست جۇيەلەرىن ازىرلەۋ.. . ادامدار نەگىزگى ارالىق يەسى بولىپ تابىلادى، ال يتتەر - اقتىق يەسى. وسى يتتەردەن اۋرۋلار ادامدارعا جۇعادى. يتتەردىڭ اۋرۋ بۇعاۋىن ءۇزۋ ماقساتىندا دياگنوستيكالىق جيىنتىق ازىرلەنىپ وتىر. بۇل جيىنتىق اۋرۋ يتتەردى دەر كەزىندە انىقتاپ، اۋرۋدى بولدىرماۋ جولدارىن انىقتاۋعا نەگىزدەلگەن» ، - دەدى قازاتۋ- دىڭ ميكروبيولوگيا جانە بيوتەحنولوگيا كافەدراسىنىڭ اعا وقىتۋشىسى وركەن اكىبەكوۆ.
ال قازاق اگروتەحنيكالىق ۋنيۆەرسيتەتىنىڭ عىلىمي زەرتتەۋ ورتالىعىنىڭ مامانى ايبەك جۇمالين ءداستۇرلى ادىستەرمەن عانا ەمەس، جاڭا تەحنولوگيالاردى پايدالانۋ ارقىلى جاسالىپ جاتقان جاڭا جوبامەن ءبولىستى.
«گەندىك، ينجەنەرلىك تەحنولوگيالاردى قولدانۋ ارقىلى سۋىققا، تۇزدارعا ءتوزىمدى بيداي تۇرلەرىن الۋ جۇمىستارىمەن اينالىسۋ بارىسىندامىز. رەسپۋبليكامىزدا بيداي، ارپامەن كوبىنەسە سولتۇستىك ايماقتاردا اينالىسادى. وندا اۋا تەمپەراتۋراسىنىڭ تومەن بولۋى ءجيى كەزدەسەدى. سوندىقتان، وسىنداي سترەسستىك جاعدايعا توزە الاتىن بيدايدىڭ ءتۇرىن الۋ وتە وزەكتى ماسەلە. الداعى 5 جىل كولەمىندە وسىنداي بيداي ءتۇرىن الۋ جوسپارلانىپ وتىر» ، - دەدى ايبەك جۇمالىين.
ايتا كەتۋ كەرەك، ۋنيۆەرسيتەت اۋماعىندا ەت، ءسۇت، استىق جانە مايلى داقىلداردى، سونداي- اق، جىلىجايلاردى، روبوتوتەحنيكالىق زەرتحانالاردى جانە گەوگرافيالىق اقپاراتتىق جۇيەلەر تەحنولوگيالارىن وڭدەۋگە ارنالعان زاماناۋي قۇرالدارمەن جابدىقتالعان ءتورت تەحنولوگيالىق الاڭ ىسكە قوسىلعان. ولاردىڭ بارلىعى شەتەلدىك سەرىكتەستەردىڭ ۇسىنىسى بويىنشا شەتەلدىك ۋنيۆەرسيتەتتەردىڭ وقۋ بازاسى نەگىزىندە قۇرىلدى.
جانسايا قامبار
Baq.kz
