الاياقتار ينتەرنەت- بانكينگ ارقىلى ادامداردى قالاي الداپ ءجۇر؟

استانا. قازاقپارات - ءى ءى د استانا قالاسىندا الاياقتىق ءىسى بويىنشا تەكسەرۋ جۇرگىزىپ جاتىر.

ءى ءى د ك پ ب باسشىسى تالعات بولەگەنوۆتىڭ مالىمەتىنشە، سايتتا وتىرعان الاياق ساتىپ الۋشىعا باسپانا نە كولىكتى ساتىپ الۋ ءۇشىن كەپىل اقشاسىن بەرۋ كەرەك ەكەنىن ايتادى. سەنىمگە كىرگەن سوڭ ينتەرنەت- بانكينگ قىزمەتىنە قوسىلىپ، ءوز تەلەفونىنىڭ ءنومىرىن اتايدى.

وسىلايشا ساتىپ الۋشىلار «ينتەرنەت بانكينگ» قىزمەتىنىڭ قالاي جۇمىس ىستەيتىنىن بىلمەيتىندىكتەن، الاياققا بانك كارتاسىنداعى، ەسەپشوتىنداعى اقشاعا جول اشىپ بەرەدى.

ماسەلەن، ساتىپ الۋشى تونىن ساتاتىنىن ايتىپ، حابارلاما جازادى. ونىڭ تەلەفونىنا WhatsApp Messenger ارقىلى حاتتار كەلىپ تۇسە باستايدى.

ولاردىڭ ىشىندە بىرەۋى ءوزىنىڭ باسقا قالادا ەكەنىن، سوندىقتان اقشانى كارتاعا اۋدارىپ، توندى كەيىن الاتىنىن ايتادى. ساتۋشى بۇعان كەلىسىپ، كارتا ءنومىرىن جىبەرەدى. تەلەفونىنا ينتەرنەت- بانكينگتەگى جەكە كابينەتىنە كىرۋ ءۇشىن كود جازىلعان حابارلاما كەلەدى. ساتۋشى تۇك ويلانباستان ول كودتى ساتىپ الۋشىعا جىبەرەدى. سالدەن ۋاقىتتان سوڭ تەلەفونىنان ەسەپشوتىنداعى بارلىق اقشانىڭ وزگەگە اۋدارىلعانى جونىندە حابارلاما كەلەدى.

وسىلايشا الاياقتارعا الدانىپ قالماس ءۇشىن ءى ءى د ازاماتتاردى اسا ساق بولۋعا شاقىرادى. كارتا ءنومىرى مەن پين- كودتى ەشكىمگە كورسەتپەۋ كەرەك ەكەنىن ەسكەرتەدى. بەيتانىس ءنومىر ارقىلى اۋدارما جاساۋدان، ءوزىڭىز جاساماعان قىزمەتتى راستاۋدان، جەكە مۇلىكتى تەگىن ينتەرنەت پورتالدارى ارقىلى ساتىپ الۋدان، كومپيۋتەردە كۇماندى باعدارلامالاردى قولدانۋدان، كومپيۋتەر مەن پلانشەت، سمارتفونعا ساپاسىز انتيۆيرۋس قويۋدان اۋلاق بولۋعا شاقىرادى. الاياقتىڭ قۇرىعىنا تۇسكەن جاعدايدا 716010, 716335, 716291 نەمەسە 102 نومىرىنە حابارلاسىڭىز.