ەلباسى قازاقستاننىڭ حالىق ءارتىسى دوسحان جولجاقسىنوۆتى قابىلدادى
كەزدەسۋ بارىسىندا نۇرسۇلتان نازاربايەۆ دوسحان جولجاقسىنوۆتىڭ وتاندىق كينەماتوگرافيا جانە تەاتر ونەرىن دامىتۋعا سىڭىرگەن ەڭبەگىن ەرەكشە اتاپ ءوتتى.
«ءسىز - وتاندىق مادەنيەتتىڭ كورنەكتى وكىلدەرىنىڭ ءبىرىسىز، قازاقستاننىڭ حالىق ءارتىسىسىز. ۇزاق جىلدار بويى بالالار مەن جاسوسپىرىمدەر تەاترىنا باسشىلىق ەتتىڭىز. وسى ۋاقىت ىشىندە مادەنيەتىمىزدىڭ دامۋىنا جانە قازاقستان قوعامىنىڭ رۋحاني تۇرعىدان جاڭعىرۋىنا زور ۇلەس قوستىڭىز»، - دەدى مەملەكەت باسشىسى.
قازاقستان پرەزيدەنتى كينويندۋستريانىڭ ماڭىزدىلىعىن ايرىقشا اتاپ ءوتىپ، ونىڭ قازىرگى مادەنيەت سالاسىندا الاتىن ورنىنا توقتالدى.
«بۇگىندە كينو ۇلتتىق سانا- سەزىم مەن ءتول مادەنيەتىمىزدى بەينەلەيتىن نەگىزگى قۇرالدىڭ بىرىنە اينالدى. سوندىقتان مەن ءسىزدى وتاندىق كينومىزدى ودان ءارى دامىتۋ ماسەلەلەرىن تالقىلاۋ ءۇشىن شاقىردىم»، - دەدى ەلباسى.
دوسحان جولجاقسىنوۆ نۇرسۇلتان نازاربايەۆقا قازاقستاننىڭ كينەماتوگرافيا ونەرىنە ەرەكشە كوڭىل ءبولىپ وتىرعانى ءۇشىن العىس ايتتى.
«ءسىزدىڭ جان- جاقتى قولداۋىڭىزدىڭ ارقاسىندا قازىرگى كينويندۋستريا سالاسى دامۋدىڭ جاڭا ساتىسىنا كوتەرىلدى. قيىندىقتارعا قاراماستان، «كوشپەندىلەر» فيلمىن ءتۇسىرىپ، حالقىمىزدىڭ تاريحىن كۇللى الەمگە تانىتتىق. سودان كەيىن «جاۋ جۇرەك مىڭ بالا» مەن «الماس قىلىش» فيلمدەرى، سونداي- اق مەنىڭ «ءبىرجان سال»، «قۇنانباي» فيلمدەرىم جانە باسقا كينوتۋىندىلار ءتۇسىرىلدى. ەلىمىزدىڭ بۇكىل ءوڭىرىن ارالاپ، «قۇنانباي» فيلمىن كورسەتتىك. ءبىز كينو ارقىلى تاريحي وقيعالار مەن قازاق حالقىنىڭ مىنەز- قۇلقىن بەينەلەپ، جۇرتشىلىق ساناسىنا رۋحاني جاڭعىرۋدىڭ نەگىزگى يدەيالارىن سىڭىرۋگە تىرىستىق»، - دەدى حالىق ءارتىسى.
