نۇرسۇلتان نازاربايەۆ ەلشىلەردەن سەنىم گراموتالارىن قابىلدادى - فوتو
اتاپ ايتقاندا، مەملەكەت باسشىسىنا رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين، تۇرىكمەنستان ەلشىسى تويلى كومەكوۆ، وزبەكستان ەلشىسى سايديكرام نيازحودجايەۆ، يتاليا ەلشىسى پاسكۋالە د'اۆينو سەنىم گراموتالارىن تابىستادى.
«اقورداداعى سەنىم گراموتاسىن تاپسىرۋعا ارنالعان سالتاناتتى شاراعا قوش كەلدىڭىزدەر. بارشاڭىزدى قازاقستانداعى جاڭا ديپلوماتيالىق ميسسيالارىڭىزدىڭ رەسمي باستالۋىمەن شىن جۇرەگىممەن قۇتتىقتايمىن. جاۋاپتى ءارى مارتەبەلى مىندەتتەرىڭىز ەلدەرىمىز اراسىنداعى ىنتىماقتاستىقتى ودان ءارى نىعايتۋعا سەرپىن بەرەدى دەپ سەنەمىن. سىزدەردىڭ ديپلوماتيالىق قىزمەتتەرىڭىز مازمۇندى ءارى ماڭىزدى وقيعالارعا تولى كەزەڭدەردە بولعالى تۇر»، - دەدى سەنىم گراموتاسىنان كەيىن ەلشىلەرگە ءسوز ارناعان قازاقستان پرەزيدەنتى.
مەملەكەت باسشىسى قازاقستان شيرەك عاسىر ىشىندە ديپلوماتيالىق جۇيەسى ورنىققان، ازاماتتىق قوعامى كەمەلدەنگەن، ەكونوميكاسى دامىعان مەملەكەتكە اينالعانىن باسا ايتتى. سونداي-اق ەلىمىز قولعا العان يگى باستامالاردىڭ تۇپكى ماقساتى الەمدەگى وزىق دامىعان 30 ەلدىڭ قاتارىندا بولۋ ەكەندىگىن اتاپ ءوتتى.
«قازاقستان حالىقارالىق بايلانىستارىن دامىتا ءتۇسۋ ءۇشىن كوپجاقتى سىرتقى ساياسي باعىتىن جالعاستىرا بەرەتىن بولادى. ءبىز بەيبىتشىلىك پەن قاۋىپسىزدىكتى، حالىقارالىق قۇقىق نەگىزدەرىن نىعايتۋدى كوزدەيتىن ءىس-ارەكەتتەردى قولدايمىز. بۇعان قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اتقارىپ كەلە جاتقان جۇمىستارىنىڭ ناتيجەسى دالەل»، - دەدى ەلباسى.
نۇرسۇلتان نازاربايەۆ ەلىمىز حالىقارالىق كۇن تارتىبىندەگى وزەكتى ماسەلەلەردى، شيەلەنىستەردى شەشۋگە ءوز ۇلەسىن قوسىپ كەلە جاتقانىن دا ايتتى.
«سولاردىڭ ءبىرى سيرياداعى احۋالدى بەيبىت جولمەن رەتتەۋ ماسەلەسى. بۇل شيەلەنىستى تارقاتۋ ىسىندە استانا پروتسەسى ماڭىزدى رولگە يە بولىپ، ايتۋلى شارالاردىڭ بىرىنە اينالدى»، - دەدى ق ر پرەزيدەنتى.
اۆتور: مارلان جيەمباي
