ماسكەۋدە نۇرسۇلتان نازاربايەۆتىڭ «تاۋەلسىزدىك ءداۋىرى» كىتابىنىڭ تانىستىرىلىمى ءوتتى

ماسكەۋ. قازاقپارات - رەسەيدەگى قازاقستان ەلشىلىگىنىڭ قولداۋىمەن قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورى ماسكەۋدە ق ر پرەزيدەنتى نۇرسۇلتان نازاربايەۆتىڭ «تاۋەسىزدىك ءداۋىرى» كىتابىنىڭ تۇساۋكەسەرىن ۇيىمداستىردى.

كىتاپتىڭ تانىستىرىلىمى «روسسيا سەگودنيا» ح ا ا الاڭىندا ماسەكۋ-استانا ۆيدەوكوپىر تۇرىندە ءوتتى.

تۇساكەسەر راسىمىندە ينگۋشەتيانىڭ ءبىرىنشى پرەزيدەنتى، كەڭەستەر وداعىنىڭ باتىرى رۋسلان اۋشيەۆ ەلباسى كىتابىنىڭ تاجىريبە ەسەبىندە وتە پايدالى ەكەندىگىن اتاپ ءوتتى جانە بۇل تۋىندىنىڭ «بولاشاعىن ويلايتىن، ءوزىنىڭ مەملەكەتى ءۇشىن جاناشىر بولۋعا ۇمتىلاتىن ءار ادامنىڭ» ستولى ۇستىندە بولۋىن قالايتىندىعىن ءبىلدىردى.

«دوستاستىق كەڭىستىگىندە، الىس تا جاقىن مەملەكەتتەردە نۇرسۇلتان نازاربايەۆ ءتارىزدى تاجىريبەلى جانە تالانتتى باسشى جوق. ەگەر 1990-جىلدان باستاپ قازىرگى كۇنگە دەيىن قازاقستان ءجۇرىپ وتكەن جولدى ەسكە الاتىن بولساق - بۇل الدىمەن قازاقستاننىڭ تۇڭعىش پرەزيدەنتىنىڭ قاجىرلى ەڭبەگىنىڭ جەمىسى»، - دەدى ر. اۋشيەۆ.

سونداي-اق ول ءبىزدىڭ مەملەكەت باسشىسىنىڭ ەلوردانى الماتىدان استاناعا كوشىرۋ تاجىريبەسىنەن ءوزىنىڭ ۇلگى العاندىعىن ەسكە سالدى.

«ول كەزدە مەن رەسپۋبليكا پرەزيدەنتى ەدىم. ماعان دا استانانى نازرانعا كوشىرۋدى ۇسىندى. مەن نازاربايەۆتىڭ تاجىريبەسىنە سۇيەنە وتىرىپ استانانى ماگاسقا كوشىردىم. بۇگىندە ماگاس - ينگۋشەتيا استاناسى»، - دەدى ر. اۋشيەۆ.

ر ف ارنايى وكىلى ميحايل شۆىدكوي ءوز سوزىندە باسقارۋشىلىقپەن اينالىساتىندارعا، قاراپايىم جاندارعا بۇل كىتاپتى وقۋدىڭ ورنى بولەك ەكەندىگىن جەتكىزدى.

«نۇرسۇلتان ءابىش ۇلى نازاربايەۆ ءوز كىتابىندا قازاقستاننىڭ ەڭ باستى بايلىعى - ادامدار ەكەندىگىن جازادى. ەلدىڭ بولاشاعىن جارقىن ەتۋگە كوپ ۇلتتى قازاقستان قاۋقارلى»، - دەدى م. شۆىدكوي.

سونداي-اق شىعارمانىڭ تۇساۋكەسەرى اياسىندا بيىل 20 جىلدىعىن تويلاعالى وتىرعان ەلوردانىڭ 60 تان استام ءزاۋلىم دە كورىكتى نىساندارى قويىلعان «استانا - ۇلى دالانىڭ كوركى» اتتى سۋرەت كورمەسى اشىلدى. اتالعان كورمە بۇدان كەيىن بەيجىڭ، مادريد، پاريج، لوندون جانە بەرليندە كورسەتىلەتىن بولادى.