باكۋدە قازاق ۇلتتىق حورەوگرافيا اكادەمياسىنىڭ گالا- كونسەرتى بولدى
دەپ حابارلايدى «قازاقپارات» ح ا ا- نىڭ ازەربايجانداعى ءتىلشىسى.
شارا قازاقستان رەسپۋبليكاسىنىڭ ازەربايجانداعى ەلشىلىگى مەن ازەربايجان مادەنيەت جانە تۋريزم ءمينيسترىنىڭ قولداۋىمەن ۇيىمداستىرىلدى.
حورەوگرافيا اكادەمياسى تاربيەلەنۋشىلەرىنىڭ ونەرىن تاماشالاۋعا ازەربايجاندا اككرەديتتەلگەن ديپلوماتيالىق ميسسيالاردىڭ وكىلدەرى، تانىمال مادەنيەت جانە ونەر قايراتكەرلەرى، باكۋ حورەوگرافيا اكادەمياسىنىڭ وقىتۋشىلارى مەن تاربيەلەنۋشىلەرى، سونداي- اق بالەتسۇيەر قاۋىم جينالدى.
قازاقستاننىڭ ازەربايجانداعى ەلشىسى بەيبىت يسابايەۆ قازاق ۇلتتىق حورەوگرافيا اكادەمياسى تولىق كوپ دەڭگەيلى سيكلدە كاسىبي حورەوگرافيالىق ءبىلىم بەرەتىن ورتالىق ازياداعى العاشقى جوعارى وقۋ ورنى ەكەنىن تىلگە تيەك ەتىپ، ازەربايجان، فرانسيا، رەسەي، قىتاي، جاپونيا جانە باسقا ەلدەردىڭ الدىڭعى قاتارلى حورەوگرافيا وقۋ ورىندارىمەن ىنتىماقتاستىق جاسايتىنىن ايتتى.
ءوز كەزەگىندە ازەربايجان مادەنيەت جانە تۋريزم ءمينيسترى سيەۆدا مامەداليەۆا ەكى ەلدى ورتاق تۇركىلىك تامىرلار، مادەنيەت، داستۇرلەر جانە رۋحاني مۇرا بايلانىستىراتىنىن جەتكىزدى. ەلدەر اراسىنداعى تاريحي تامىرلارعا نەگىزدەلگەن قارىم- قاتىناستار ءتۇرلى سالالاردا، سونىڭ ىشىندە مادەنيەت جانە ونەر سالاسىندا دا قارقىنمەن دامىپ كەلەدى.
گالا- كونسەرتتە قازاقستاندىق جانە شەتەلدىك بالەتمەيستەرلەردىڭ ورىنداۋىندا اكادەميا رەپەرتۋارىنداعى ۇزدىك نومىرلەر، كلاسسيكالىق، قازاقشا، نەوقازاقشا (جاڭا قازاقشا) بالەتتەر قويىلدى.
«وسى شاراعا وتە مۇقيات دايىندالدىق. بالالاردا ساحناعا شىعار الدىندا ءبىراز تولقۋ بايقالدى، دەگەنمەن ولار وزدەرىن ۇستاپ، كاسىبي دەڭگەيدە ونەر كورسەتە ءبىلدى»، - دەيدى اكادەميانىڭ كاسىبي ورىنداۋشىلىق ءبىلىم بەرۋ مەكتەپ- كوللەدجىنىڭ باسشىسى سۆەتلانا كوكشينوۆا.
كورەرمەندەر اكادەميانىڭ ونەرلى ورەندەرىنىڭ شەبەرلىگىنە تامسانىپ، ءار نومىردەن سوڭ قوشەمەت ءبىلدىرىپ وتىردى.
