رەسەي ەلشىسى قازاقستاندىقتارعا العىس ايتتى

استانا. قازاقپارات - قازاقستان رەسپۋبليكاسىنداعى ر ف توتەنشە جانە وكىلەتتى ەلشىسى الەكسەي بوروداۆكين كەمەروۆو وقيعاسىنا قولداۋ بىلدىرگەندەرى ءۇشىن قازاقستاندىقتارعا العىس ءبىلدىردى، دەپ حابارلايدى «قازاقپارات» ح ا ا ءتىلشىسى.

«بۇل ۇلكەن قايعىلى وقيعا. اسىرەسە قازا تاپقانداردىڭ جاقىندارىنا وتە اۋىر. ۆلاديمير پۋتين وقيعاعا قاتىستى ءوز باعاسىن بەرىپ، جاعدايدىڭ سالعىرتتىقتىڭ كەسىرىنەن بولعانىن ايتتى. بالالاردىڭ كوز جۇمعانىن ويلاعاندا جۇرەگىڭ قارس ايىرىلادى»، - دەدى رەسەي ەلشىسى.

ديپلومات سونىمەن قاتار بۇگىن رەسەيدە قارالى كۇن جاريالانعانىن جەتكىزدى.

«ءبىزدىڭ قايعىمىزبەن ءبولىسىپ ەڭ العاش كوڭىل ايتقان مەملەكەت باسشىلارىنىڭ ءبىرى پرەزيدەنت نۇرسۇلتان نازاربايەۆقا جانە استانا، الماتى، ورال جانە وسكەمەن قالالارىنداعى رەسەي كونسۋلدىقتارىنا كەلىپ قايعىمىزعا ورتاق بولعان بارلىق قازاقستاندىقتارعا العىس بىلدىرەمىن»، - دەدى الەكسەي بوروداۆكين.