اقمولا كاسىپكەرلەرى نيدەرلاندىقتارمەن بايلانىستى نىعايتپاق
كەزدەسۋ بارىسىندا ەكى ەل اراسىنداعى اگروونەركاسىپتىك سەكتور مەن ساۋدا-ەكونوميكالىق مۇمكىندىكتەر كەڭىنەن قارالدى. وبلىس اكىمى مالىك مىرزالين اقمولا وڭىرىندە اگرارلىق، ونەركاسىپ جانە تۋريزم سالالارى جوعارى قارقىنمەن دامىپ كەلە جاتقانىن اتاپ ءوتتى. اقمولا وبلىسى مەن نيدەرلاندى اراسىندا 2017-جىلدىڭ قورىتىندىسى بويىنشا ساۋدا اينالىمى 3,2 ميلليون ا ق ش دوللارىن قۇرادى. قازىرگى ۋاقىتتا ءبىزدىڭ وبلىس بويىنشا 7 كاسىپورىندار نيدەرلاندىقتارمەن تىعىز قارىم-قاتىناستا جۇمىس ىستەيدى.
«يمپورت نەگىزىنەن ءىرى قارا، قۇس ەتى، كارتوپ تۇقىمى، مال ازىعى، مەحانيكالىق قۇرالدار، اۋىل شارۋاشىلىعى تەحنيكالارى. بۇعان قوسا، وبلىستىڭ ەكسپورتتىق الەۋەتى دە جوعارى. شيكىزاتتان بولەك، قايتا وڭدەۋشى كاسىپورىنداردىڭ ونىمدەرىن ەكسپورتتاۋعا ءبىز دايىنبىز»، - دەپ اتاپ ءوتتى مالىك مىرزالين.
ءوز كەزەگىندە ديرك يان كوپ مىرزا بىرلەسكەن كاسىپورىن قىزمەتى بويىنشا ەكىجاقتى ارىپتەستىك قاتىناستى دامىتۋعا ءازىر ەكەندىگىن جەتكىزدى.
«قازىرگى تاڭدا ەكىجاقتى قاتىناس بۇرىنعىدان جاقسى دامۋدا. ءبىز مۇنايگاز سالاسىنداعى ىسكەرلىك بايلانىستى قولدايمىز. سوڭعى كەزدەرى، اۋىل شارۋاشىلىعى سالاسىندا بايلانىس دۇرىس جولعا قويىلدى. اقتوبە، الماتى جانە شىمكەنت قالالارىندا گوللاند تەحنولوگياسىن يگەرۋ بويىنشا تاجىريبەمىز بار. ونىڭ ىشىندە اقمولا وبلىسىندا گوللاند تەحنولوگياسىن قولدانىپ جۇرگەن ەكى كاسىپورىن جۇمىس ىستەيدى»، - دەدى ديرك يان كوپ.
كەزدەسۋدە ەكىجاقتى بايلانىستى ودان ءارى نىعايتۋ جولدارى تالقىلاندى. تاراپتار دوستىق قاتىناستى نىعايتۋ جانە تاجىريبە الماسۋ ءۇشىن بيزنەسمەندەردەن قۇرالعان دەلەگاتسيانى قابىلداۋعا دايىن ەكەنىن جەتكىزدى.
وسى رەتتە، مالىك مىرزالين ينۆەستيتسيا تارتۋ جانە جاڭا تەحنولوگيالاردى قولدانۋدا اۋىل شارۋاشىلىعى مەن ونەركاسىپ سالاسىندا عانا ەمەس، تۋريستىك باعىتتا دا وبلىستىڭ قىزىعۋشىلىعى زور ەكەنىن اتاپ ءوتتى.
