قىتاي مەن سولتۇستىك كورەيا باسشىلارى بەيجىڭدە كەزدەستى

بەيجىڭ. قازاقپارات - بەيجىڭدە ك ح د ر باسشىسى كيم چەن ىن ق ح ر ءتوراعاسى شي جينپيڭمەن كەزدەستى، دەپ حابارلايدى ق ح ر- داعى «قازاقپارات» ح ا ا مەنشىكتى ءتىلشىسى قىتايدىڭ ورتالىق تەلەارناسىنا سىلتەمە جاساپ.

ك ح د ر كوشباسشىسىنىڭ قىتايعا بەيرەسمي ساپارى قىتايلىق تاراپتىڭ شاقىرتۋىمەن 25-28 -ناۋرىز ارالىعىندا ءوتتى. ەكى مەملەكەت باسشىسىنىڭ كەلىسسوزدەرى بۇكىل قىتاي حالىق وكىلدەرى قۇرىلتايى عيماراتىندا ءوتتى. سولتۇستىك كورەيا قوناعى مەن ونىڭ جۇبايى لي سول جۋدىڭ قۇرمەتىنە دياويۋيتاي مەملەكەتتىك رەزيدەنسياسىندا بانكەت بولدى. وعان شي جينپيڭ مەن ونىڭ جۇبايى پەن ليۋان، ق ح ر مەملەكەتتىك كەڭەسىنىڭ پرەمەرى لي كىشياڭ، ق ح ر ءتوراعاسىنىڭ ورىنباسارى ۋاڭ شيشان، باسقا دا شەنەۋنىكتەر قاتىستى.

«ساپار ەرەكشە ۋاقىتتا ءوتىپ جاتىر جانە ونىڭ ماڭىزى زور. ءبىز بۇل ساپاردى جوعارى باعالايمىز (...) قىتاي مەن ك ح د ر ءداستۇرلى دوستىعىنىڭ نەگىزى قالاندى جانە ارى قاراي دامي بەرمەك. بۇل ءبىزدىڭ بىرلەسكەن تەڭدەسى جوق يگىلىگىمىز»، - دەدى شي جينپيڭ كيم چەن ىنمەن كەزدەسۋ كەزىندە.

قىتاي كوشباسشىسى ەكىجاقتى قارىم-قاتىناستى دامىتۋ بويىنشا 4 ۇسىنىستى العا تارتتى: بايلانىستى جوعارى دەڭگەيدە جالعاستىرۋ، پارتيالار اراسىندا وزەكتى ماسەلەلەر بويىنشا پىكىر الماسۋ، بەيبىت دامۋدى، گۋمانيتارلىق ىنتىماقتاستىقتى، اسىرەسە ەكى ەل جاستارىنىڭ اراسىندا نىعايتۋ.

كيم چەن ىن ءوز تاراپىنان قىتاي كوشباسشىسىنىڭ قايتا سايلانۋىمەن قۇتتىقتادى.

«قىتايمەن جاڭا جاعدايدا دوستاستىقتى دامىتۋ - ك ح د ر-دىڭ ستراتەگيالىق تاڭداۋى جانە بۇل قانداي جاعدايدا دا وزگەرىسسىز قالادى»، - دەدى ول.

ەكى ەل باسشىلارى الەۋمەتتىك- ەكونوميكالىق دامۋ، حالىقارالىق جاعداي مەن كورەيا تۇبەگىندەگى احۋال تۋرالى پىكىر الماستى.

«كيم ير سەن مەن كيم چەن يردىڭ وسيەتىنە سايكەس، كورەيا تۇبەگىن دەنۋكلەاريزاتسيالاۋ بويىنشا بەلسەندى كۇش سالامىز. جانە بۇل ۇستانىم وزگەرمەيدى»، - دەپ اتاپ ءوتتى سولتۇستىك كورەيا كوشباسشىسى.