بايان- ولگەيدە سوققان داۋىل بىرنەشە مەكتەپتى شاتىرسىز، ءبىر اۋىلدى جارىقسىز قالدىردى
داۋىل كەشە، 26 - ناۋرىز كۇنى بولعان. ايماقتىق ەلەكتر جەلىسى باسقارماسى تاراپىنان ءتيىستى شارالار قولعا الىنۋدا. ماماندار ەلەكتر جەلىسىن قالپىنا كەلتىرۋ ءۇشىن بىرنەشە كۇن قاجەتتىگىن ايتۋدا.
ال ۇلانقۇس اۋىلى اكىمى نۇرلان وڭاشىباي ۇلىنىڭ مالىمەتىنشە، اتالمىش اۋىلدىڭ تالشىقتى- وپتيكالىق كابەلى ءۇزىلىپ، سوعاق ورتا مەكتەبىنىڭ كوكونىس جىلىجايى جەلگە ۇشقان. سونداي- اق شاڭدى داۋىلدىڭ سالدارىنان، جەرگىلىكتى اۋەجايعا ۇشاقتار قونا المادى.
داۋىل كۇنى عيماراتتاردىڭ شاتىرى جەلگە ۇشىپ، كەيبىر ۇيلەردىڭ قورشاۋى قۇلاعان. مىسالى ولگەي كەنتىندە - 10، ۇلانقۇس، تۇلبا اۋىلدارىندا - 2، ساقسايدا - 7، بۇيىنتى اۋىلىندا - 5، بۇلعىن اۋىلىندا 1 ءۇيدىڭ قورشاۋى قۇلاپ، شاتىرى بۇلىنگەن.
بۇگىنگى تاڭدا ايماقتىق توتەنشە جاعدايلار جونىندەگى كوميتەتى، كەلگەن شىعىن كولەمىن انىقتاپ جاتىر. ال ايماقتىق سۋ، مەتەورولوگيالىق جانە ەكولوگيالىق قاداعالاۋ باسقارماسىنىڭ بولجاۋىنشا، 27 - ناۋرىزدان 2 - ساۋىرگە دەيىنگى ارالىقتا 12-14 م/س جىلدامدىقپەن سوققان جەلدىڭ ەكپىنى 20-22 م/س جەتىپ، سوڭى كۇشتى داۋىلعا ۇلاسۋى مۇمكىن.
اۆتور: قۋات ۋاتحان
