مەن اسپاز بولىپ كەتەتىن شىعارمىن - قىتاي ەلشىسى

استانا. قازاقپارات - ق ح ر- دىڭ قازاقستانداعى توتەنشە جانە وكىلەتتى ەلشىسى چجان حانحۋەي ءوز ەلىندەگى اقپاراتتىق تەحنولوگيالاردى دامىتۋ جايىندا ايتىپ بەردى، دەپ حابارلايدى قازاقپارات ءتىلشىسى.

ەلشىنىڭ سوزىنە قاراعاندا، بۇگىندە قىتايدا جاسالعان روبوتتورعا سۇرانىس جوعارى. ال ەكسپورتتاعى ۇلەس 40 پروتسەنتتى قۇراپ وتىر. اتالعان تەحنولوگيالاردى قولدانۋ اياسى دا كەڭ. «ماسەلەن، قازىرگى كەزدە دارىگەر- روبوت بار. وعان ونداعان عالىم مەن دارىگەردىڭ تاجىريبەسىن ەنگىزىپ قويعان. ول ءوزى دە كوپ نارسەگە ۇيرەنىپ، تاجىريبە جيناي الادى. دياگنوزدى ءوزى قويادى دا، ەمدەۋ شارالارىن بەلگىلەيدى. ارينە، ازىرشە ونىڭ جانىندا كادىمگىدەي ادام دارىگەر وتىرادى. ولار بارلىق جازبالاردى تەكسەرەدى. ەندى، مۇنىڭ بارلىعى تاجىريبە جۇزىندە قولعا الىنىپ وتىر. دەگەنمەن، الداعى ۋاقىتتا وسى كۇندەلىكتى ومىرىمىزگە كەلەدى»، - دەيدى چ. حانحۋەي.

ونىڭ ايتۋىنشا، اقپاراتتىق تەحنولوگيالاردىڭ كەڭىنەن ەنگىزىلۋىمەن جۇمىسسىزدىق ماسەلەسى دە كۇشەيەدى. بۇنى قىتاي ەلى دە جاقسى تۇسىنەدى. «ديپلوماتتار دا جۇمىسسىز قالاتىن شىعار (كۇلدى). ءبىزدىڭ ساياساتىمىزدى باعدارلاماعا سالىپ، سوڭعى جۇزدەگەن جىلدىڭ حالىقارالىق قاتىناستارى تۋرالى بارلىق اقپاراتتى ەنگىزسە، ونداي روبوت قىتاي ەلشىسىنەن دە اقىلدى بولادى. وندا مەن قىتاي اسحاناسىنىڭ اسپازى بولىپ كەتەتىن شىعارمىن (كۇلدى)»، - دەدى چ. حانحۋەي.

ايتا كەتەيىك، بۇگىن ەلشى چ. حانحۋەي جۋرناليستەرمەن كەزدەسىپ، ەكىجاقتى بايلانىستاردى دامىتۋ جايىندا ايتىپ بەردى. ونىڭ سوزىنە قاراعاندا، قىتايدىڭ قازاق حالقىنا دەگەن قىزىعۋشىلىعى ارتىپ كەلەدى.