الماتىلىقتار كيىز ءۇي تىگۋدى ۇيرەندى - فوتو
مادەني شارا «رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ، «الماتى قولونەرشىلەر پالاتاسى» قوعامدىق قورىنىڭ قولداۋىمەن ۇيىمداستىرىلدى.
جينالعاندار حالىق مۋزىكاسىن، ونەرىن دامىتۋ، ناسيحاتتاۋ ماقساتىندا قويىلعان ەتنو ستيلدەگى كونسەرتتى تاماشالادى.
قالا تۇرعىندارى مەن شەتەلدىك قوناقتار ءۇشىن قازاق حالقىنىڭ تۇرمىسى مەن تىرشىلىگىنىڭ سيمۆولى ىسپەتتى كيىز ءۇي قويىلدى.
كورمە كورەرمەندەرى ءۇشىن كيىز توقۋ ونەرى بويىنشا شەبەرلىك كلاسى ءوتتى.
جارمەڭكەگە كەلگەن ءاربىر قوناق كيىز ۇيمەن ءجىتى تانىسىپ، ەستەلىك رەتىندە سۋرەتكە ءتۇسىپ، «Yurtart» قازاق كيىز ۇيلەرىن جانە ۇلتتىق كوركەمونەر كاسىبي زاتتارىن جاساۋ تەحنولوگياسىمەن تانىستى.
«بۇل جارمەڭكە جىلىنا 10 رەت ۇيىمداستىرىلادى. ناۋرىزداعى جارمەڭكەنىڭ ەرەكشەلىگى - ۇلتتىق قولونەر بۇيىمدارىن جاساۋ تەحنولوگياسى تانىستىرىلدى. بۇگىن بىزگە قازاقستاننىڭ تۇكپىر- تۇكپىرىنەن، رەسەيدەن، قىرعىز ەلىنەن 80 نەن اسا قولونەرشى شەبەرلەر كەلدى. كورمە رۋحاني مۇرامىزدى، مادەنيەتىمىزدى، ءداستۇرىمىز بەن ادەت- عۇرىپتارىمىزدى ساقتاپ قالۋ، قازاقستاندا قولونەردى دامىتۋ جانە جاستاردىڭ اراسىندا دارىپتەۋ، ۇلتتىق كاسىپتى جانداندىرۋ جانە دامىتۋ، قولونەرشىلەردى قولداۋ ماقساتىندا وتكىزىلىپ جاتىر. وسى ءىس- شارانى وتكىزۋ بارىسىندا قولونەرشىلەر مەن تۇتىنۋشىلار اراسىندا تىكەلەي بايلانىس ورنايدى»، - دەدى ۇيىمداستىرۋشىلاردىڭ ءبىرى دامەلى جاناشيەۆا.
جارمەڭكەدە مەرەكەلىك داستارحانعا ارنالعان كەراميكادان جانە اعاشتان جاسالعان ىدىستار، كۇمىستەن جاسالعان اشەكەيلەر، قولدان جاسالعان سومكەلەر مەن ويىنشىقتار، قازاقستاندىق اگات پەن تابيعي تاستاردان جاسالعان اشەكەيلەر، كوركەم پەنجەكتەر مەن حالاتتار، كيىزدەن يلەنگەن كيىمدەر، قولدان جاسالعان كىلەمدەر قويىلدى.
قولونەر مەرەكەسى بۇگىن دە جالعاسىن تاپپاق.
اۆتور: گۇلميرا عوسمانالي
