ناۋرىزدى يران قازاقتارى قالاي تويلايدى
وسى جانە باسقا دا قىزىقتار تۋرالى يراننان تاريحي وتاندارىنا ورالعان قانداستارىمىز ايتىپ بەردى، دەپ حابارلايدى «قازاقپارات» ح ا ا ءتىلشىسى.
«يرانداعى ەڭ ۇلكەن مەرەكەلەر قاتارىنا قۇربان اي پەن ورازا ايت جاتادى. ناۋرىز ودان كەيىنگى ورىندا. ناۋرىز مەرەكەسىندە ەلدە ءبىر اپتا دەمالىس جاريالانادى. كوشەلەردە جارمەڭكەلەر ۇيىمداستىرىلىپ، وتشاشۋلار اتىلادى»، - دەيدى ابدۋللا قاناعات.
يرانداعى قازاقتار پارسى ءتىلىن بىلۋگە مىندەتتى، الايدا ولار ءوز ۇيلەرىندە تەك قانا انا تىلدەرىندە سويلەيدى. سونىمەن بىرگە كوپتەگەن ۇلتتىق سالت-داستۇرلەر ساقتالىپ قالعان.
مىسالى «ايتتىرۋ» سالتى ساقتالعان. اتا-انا ۇيدەگى ۇلىنا قالىڭدىقتى ءوزى تاڭداپ بەرەدى. ناۋرىزدا قازاق قىزدارى جىگىتتەرگە كەستەلى ورامال سىيعا تارتادى. جىگىتتەر دە جاۋاپ رەتىندە قىزدارعا سىيلىق ۇسىنۋى كەرەك.
«شىلدەحانا»، «تۇساۋ كەسەر»، «سۇندەت توي» يراندىق قازاقتاردا جاقسى ساقتالعان. الايدا مۇندا كيىز ءۇي تىگىپ، التىباقان قۇرمايدى. ۇلتتىق كيىمدەر دە كيىلمەيدى.
«ناۋرىز مەرەكەسىنە يران قازاقتارى مىندەتتى تۇردە جاڭا كيىم كيىپ شىعۋى ءتيىس. اۋىلداردا ناۋرىز كوجە دايىندالىپ، ەت اسىلادى. ماڭايداعىلار ءبىر-بىرىنە قوناققا بارادى. ودان كەيىنگى مەرەكەلىك استىڭ ءبىرى - سۇمەلەك. مەيرامنان ەكى اپتا بۇرىن بيدايدىڭ ءدانىن ەگىپ ونىڭ ساباعىنان سۇمەلەك دايىندالادى. سودان سوڭ داستارحانعا ءسان ءۇشىن ىشىندە بالىعى بار اكۆاريۋم قويىلادى. اكۆاريۋم مەن سۇمەلەك يران حالقىنان الىنعان ءداستۇر»، - دەيدى ابدوللا قاناعات.
يران قازاقتارى ناۋرىزدا ءبىر-بىرىنە «ءار كۇندەرىڭ جاڭا بولسىن، ءار جاڭا كۇندەرىڭ جەمىستى بولسىن!» دەگەن تىلەك ايتادى.
