كورەيادا قازاق ءتىلى جانە دومبىرا ۇيىرمەسى اشىلۋى مۇمكىن
قانداستارىمىز 2012 -جىلى ءوز الدىنا «توميريس» اتتى قوعامداستىق قۇرىپ العان. وعان تاڭعى سامال ەلىندە وتباسىن قۇرعان نەمەسە وقۋعا كەلگەن قازاقستان ازاماتتارى دا مۇشە. ازىرگە بىرلەستىكتە 30 عا جۋىق ادام بار. بارلىعى قازاقتىڭ ۇلتتىق مەيرامدارىن اركەز بىرگە تويلايدى.
«بىلتىرعى جىلى جازدا قازاق ەلى شاقىرىپ، بەسىنشى قۇرىلتايعا بارىپ كەلگەنبىز. سول ۋاقىتتان بەرى كورەيادا بۇكىل قازاقتاردى جيناپ، باس قوسساق دەگەن وي تۋدى. ءاربىر ادام ءوز ۇلەسىن قوسىپ وتىر. سول الىستا جۇرسەك تە، قازاق ەلى جۇرەگىمىزدە»، - دەدى كورەياداعى قازاق دياسپوراسىنىڭ وكىلى ەسىمگۇل تۇسىپبەكوۆا.
ۇلىستىڭ ۇلى كۇنىندە سەۋلدەگى جاھاندىق ورتالىقتىڭ مۇرىندىق بولۋىمەن مەرەكەلىك داستارقان جايىلىپ، كونسەرت ۇيىمداستىرىلدى. قوعامداستىق الداعى ۋاقىتتا وڭتۇستىك كورەيادا قازاق ءتىلى مەن دومبىرا ۇيىرمەسىن اشۋدى جوسپارلاپ وتىر.
«قازاق ءتىلى ساباقتارىن، وكىنىشكە قاراي، ءالى وتكىزىپ جۇرگەن جوقپىز، مىقتى ماماندار دا شىنىمەن جوق ءالى. ورىس ءتىلىن جۇرگىزىپ جاتىر ءبىراق. ەندى قازاق مەكتەبىن اشساق، قازاقي ۇيىرمەدەن باستاساق پا دەگەن ماقساتىمىز بار. دومبىرا ساباعىن وتكىزگەنبىز، وعان ەندى قازاقتىڭ ازاماتتارى عانا ەمەس، كورەيا ازاماتتارى دا كوپ قىزىعۋشىلىعىن ءبىلدىرىپ وتىر»، - كورەياداعى قازاق دياسپوراسىنىڭ تاعى ءبىر وكىلى دينارا قوشقاربايەۆا.
