شىمكەنتتەگى ناۋرىز مەرەكەسىندە العاش رەت تازى-توبەت جارىسى كورسەتىلدى - فوتو
ناۋرىز مەرەكەسىنە وراي مۇندا جاڭا اربات اشىلدى. سالتاناتتى شاراعا قاتىسقان وبلىس اكىمى جانسەيىت تۇيمەبايەۆ شاھار تۇرعىندارىن جاڭا دەمالىس ورنىنىڭ اشىلۋىمەن قۇتتىقتادى، دەپ حابارلايدى قازاقپارات ءتىلشىسى.
مەرەكە قالاداعى ورتالىق اتشابارداعى ۇلتتىق سپورت ويىن تۇرلەرىنەن وتكەن جارىسپەن جالعاستى. اتاپ ايتقاندا، كوكپار، بايگە، قىز قۋۋ ويىندارى جينالعان جۇرتتىڭ دەلەبەسىن قوزدىردى.
بيىلعى ناۋرىز مەيرامىنداعى سايىستىڭ ەرەكشەلىگى العاشقى رەت تاي جارىسى مەن قىسقا قاشىقتىقتاعى ات جارىسى ءوتتى. سونداي-اق، قوناقتار جامبى اتۋ، اۋدارىسپاق، تەڭگە ءىلۋ، تازى-توبەت جارىسى، قوشقار كوتەرۋ سىندى سايىستاردى تاماشالادى. ۇلتتىق ويىندار دا شەت قالمادى، اسىرەسە، ۇمىت بولا باستاعان شوگەن ويىنى العاش رەت كورسەتىلىپ، كوپشىلىكتى تامساندىردى. بۇركىت سالۋ سىندى قۇسبەگىلىك ونەر كورسەتىلدى.
كوكپار جارىسىنىڭ اقتىق سىنى ءوتتى. اقتىق سايىستا قازىعۇرت پەن شىمكەنتتىڭ شاباندوزدارى جارىسىپ، ناتيجەسىندە شىمكەنت قالاسىنىڭ قۇراماسى 1-ورىندى يەلەندى. 2-ورىن قازىعۇرتقا، 3-ورىن تۇلكىباس، 4-ورىن ماقتارال اۋدانىنا بۇيىردى. ال اسىق اتۋ سايىسىندا قارابايەۆ الماستىڭ اسىعى الشاسىنان ءتۇستى. ماراپاتتاۋ ساتىندە ۇزدىكتەرگە باعالى سىيلىقتار ۇسىنىلدى.
