رەسەي قازاقستاندىقتاردى تىركەۋ ەرەجەسىن وزگەرتەدى

استانا. قازاقپارت - 2018-جىلدىڭ 25- مامىرىنان 25- شىلدەسىنە دەيىن، رەسەيدە فۋتبولدان الەم چەمپيوناتى وتۋىنە بايلانىستى، ماسكەۋ، سانكت-پەتەربۋرگ، قازان، سوچي، ۆولگوگراد، ەكاتەرينبۋرگ، كالينينگراد، نيجنيي نوۆگورود، دونداعى روستوۆ، سامارا جانە سارانسك قالالارىندا شەتەل ازاماتتارىن تىركەۋدىڭ ەرەكشە ەرەجەلەرى قولدانىلادى.

بۇل تۋرالى قازاقپارات ق ر رەسەيدەگى ەلشىلىگىنىڭ سايتىنا سىلتەمە جاساپ حابارلايدى.

25- مامىردان باستاپ جوعارىدا اتالعان قالالارعا باراتىن قازاقستان ازاماتتارى ءبىر تاۋلىك ىشىندە كوشى-قون جونىندەگى جەرگىلىكتى ورگاندا تىركەلەدى، كوشى-قون ورگاندارى 25- مامىردان 25- شىلدەگە دەيىن كۇشەيتىلگەن رەجيمدە جۇمىس ىستەيدى.

وسى ەرەجەلەر ماسكەۋ، سانكت-پەتەربۋرگ، قازان، سوچي، ۆولگوگراد، ەكاتەرينبۋرگ، كالينينگراد، نيجني نوۆگورود، دونداعى روستوۆ، سامارا جانە سارانسك قالالارىنا بارعان شەتەل ازاماتتارىنا عانا جۇرەدى، ال ەلدىڭ باسقا وڭىرلەرىندە بۇرىنعى ءتارتىپ ساقتالادى. ياعني ر ف- عا 30 كۇننەن از ۋاقىتقا بارعان قازاقستان ازاماتتارى تىركەلۋگە مىندەتتى ەمەس.

قوناق ۇيلەردە، ساناتوريلەردە، دەمالىس ۇيلەرى نەمەسە باسقا دا ۋاقىتشا ورنالاسۋ ورىندارىندا ۋاقىتشا تۇراتىن قازاقستان ازاماتتارىنىڭ تىركەلۋىنە قابىلداۋشى تاراپ (قوناق ءۇي، ساناتوري، ت. ب. اكىمشىلىگى) جاۋاپتى.

كونسۋلدىق وكرۋگتەرگە سايكەس، ر ف قالالارىنىڭ اۋماعىنداعى ق ر ازاماتتارى مىنا مەكەمەلەرگە حابارلاسۋىنا بولادى:

- ماسكەۋ، سوچي جانە دونداعى روستوۆ - ماسكەۋدەگى ق ر ەلشىلىگىنىڭ كونسۋلدىق بولىمىنە؛

- سانكت-پەتەربۋرگ جانە كالينينگراد - سانكت-پەتەربۋرگتەگى ق ر باس كونسۋلدىعىنا؛

- قازان، ەكاتەرينبۋرگ، نيجني نوۆگورود جانە سارانسك - قازانداعى ق ر باس كونسۋلدىعىنا؛

- ۆولگوگراد جانە سامارا - استراحانداعى ق ر كونسۋلدىعىنا.