بريتاندىق ازامات قوناقجاي قازاق ەلىنە العىسىن ءبىلدىردى
ۇلى بريتانيا تۇرعىنى مايكل ساگاتيس قازاقتىڭ قوناقجايلىلىعىنا العىسىن ءبىلدىردى، دەپ حابارلايدى قازاقپارات ءتىلشىسى.
كىتاپحانانىڭ بريتاندىق بۇرىشىنا مەكتەپ وقۋشىلارى، ستۋدەنتتەر مەن اعىلشىن ءتىلىن وقىپ جۇرگەن قالا تۇرعىندارى جينالدى. ولار اۋليە پاتريك كۇنىنە ارنالعان بەينەجازبانى كوردى. يرلانديا مەن يرلاندىقتار قونىستانعان ەلدەردە وتەتىن مەيرام اقتوبەدە دە اتاۋسىز قالمادى.
باس قوسقان جاستارعا قاعاز تاراتىلىپ، تاڭقالدىرعان جاعدايلار تۋرالى جازۋ تاپسىرىلدى. اقتوبەگە كەلىپ، ءوزىنىڭ اجەسى جوزەف بۋيدونى ىزدەپ جۇرگەن ۇلى بريتانيا تۇرعىنى مايكل ساگاتيس قازاق حالقىنىڭ قوناقجايلىلىعىنا تاڭقالعانىن جاسىرمادى.
«مەن قازاق حالقىنىڭ كەڭپەيىلدىلىگىنە العىس ايتامىن. ەكى كۇن بۇرىن نوۋتبۋكتىڭ قۋاتى ءوشىپ، باتارەياسى سىنىپ قالدى. مەنىڭ دوسىم سامات دۇكەندەردى مەنىمەن بىرگە ارالاپ، قاجەتتى ۇلگىسىن ىزدەۋگە شىقتى. ءبىراق تابىلمادى. كەيىن ينتەرنەت ارقىلى تاپسىرىس بەردى. جان-جاعىمدا جاقسى ادامدار كوپ. ءتىپتى جەرگىلىكتى مونشاعا بارعان كەزدە جۇمىس ىستەيتىن ادامدار مەنى قوناققا شاقىردى. قازاقتىڭ ۇلتتىق تاعامى، ەت اسقانى ماعان ۇنايدى. تاعامى وتە ءدامدى»، - دەدى م. ساگاتيس.
قازاقتىڭ ۇلتتىق مادەنيەتى، مۋزىكاسى دا شەتەلدىك قوناققا ۇنادى. ول جۇبانوۆتار الەمى ورتالىعىندا بولىپ، دومبىرا، جەتىگەن اسپاپتارىمەن تانىستى.
«قازاقتىڭ ۇلتتىق استاپتارى ماعان ۇنادى. جۇبانوۆتار الەمىنە بارىپ، دومبىرا مەن جەتىگەننىڭ ءۇنىن تىڭدادىم. قازاقتار كاراوكەدە ءان شىرقاعاندى ۇناتادى ەكەن. مەن دە قوسىلا شىرقادىم»، - دەدى بريتاندىق ازامات.
ايتا كەتەيىك، م. ساگاتيس ەرتەڭ تۋعان ولكەسى ۋەلس قالاسىنا جولعا شىعادى. دەگەنمەن وسى جىلدىڭ جاز ايلارىندا قايتا كەلىپ، ءوزىنىڭ اجەسىن ىزدەۋ جۇمىستارىن جالعاستىرادى. ول اقتوبەگە 2017 -جىلدىڭ جەلتوقسان ايىندا كەلگەن بولاتىن. ۇلىبريتانيا ازاماتى 1940 -جىلى شىعىس پولشادان اقتوبەگە جەر اۋدارعان يۋزەف بۋيدونى ىزدەپ ءجۇر.
دەرەكتەرگە سۇيەنسەك، يۋ. بۋيدو اقتوبە قالاسىندا تۇرىپ، كەيىن العا اۋدانىنىڭ شيبايەۆكا اۋىلىنا قونىس اۋدارعان. ول تۋرالى بريتاندىق ازامات ەكى جىل بۇرىن عانا ءبىلدى. م. ساگاتيس اجەسىنىڭ قازاقستاننان پولشاعا جازىلعان حاتتارىن تاۋىپ العان.
