ءۇندىستانعا اۋە رەيستەرىنىڭ سانى ارتادى - ازاماتتىق اۆياتسيا كوميتەتى

استانا. قازاقپارات - ءۇندىستانعا اۋە رەيستەرىنىڭ سانى ارتادى، دەپ حابارلايدى «قازاقپارات» ح ا ا ق ر ي د م ازاماتتىق اۆياتسيا كوميتەتىنىڭ باسپا ءسوز قىزمەتىنە سىلتەمەمەن.

«ءۇندى ەلىنە 2004-جىلدان بەرى تۇراقتى تۇردە حالىقارالىق رەيستەر جاسالىپ كەلەدى. ەكى ەل اراسىنداعى باعىتتاردا جولاۋشىلار اعىنى جىل سايىن ءوسىپ، ترانزيتتىك الەۋەتى جوعارى قاتىناس جولى بولىپ تابىلادى. سول سەبەپتى، وتكەن جىلدىڭ شىلدە ايىندا بۇرىننان بار «الماتى - دەلي» اراسىنداعى باعىتقا «استانا - دەلي» تۇراقتى رەيسى قوسىلدى» دەلىنگەن حابارلامادا.

دەگەنمەن، كوميتەت ماللىمەتى بويىنشا، سوڭعى جىلدارى قازاقستاندىق تاسىمالداۋشىلارعا ءۇندى تاراپىنان كەيبىر اۋە كەمەلەرىن پايدالانۋ بويىنشا، ياعني تەحنيكالىق مۇمكىندىگى بولا تۇرا بەلگىلى ءبىر ۇشاق تۇرلەرىن دەلي باعىتىندا قولدانۋعا تىيىم سالىنىپ كەلگەن. بۇل ءوز كەزەگىندە، اۋە كەمەلەرىنىڭ پاركىن قولدانۋ تيىمدىلىگىن كەمىتىپ، كەيبىر رەيستەردىڭ كەشىگۋىنە اكەلىپ سوعاتىن.

«ازاماتتىق اۆياتسيا كوميتەتىنىڭ ءۇندى ەلىنىڭ اۆياتسيالىق بيلىك وكىلدەرىمەن جۇرگىزگەن كەلىسسوزدەرى ناتيجەسىندە 2018-جىلدىڭ ناۋرىز ايىنان باستاپ وتاندىق تاسىمالداۋشىلارعا قازاقستان مەن ءۇندىستان ارالىعىندا قولدانىستاعى بارلىق اۋە كەمەلەرىن پايدالانۋعا رۇقسات بەرىلدى. بۇل شەشىم ەكى ەل اراسىنداعى اۋە قاتىناسىن نىعايتىپ، رەيستەردىڭ ۋاقىتىلى ورىندالۋىنا، ۇشۋ جيىلىگىن ارتتىرۋعا ايتارلىقتاي اسەر ەتەدى» دەپ ءمالىم ەتتى اتالعان كوميتەت باسپا ءسوز قىزمەتى.

ايتا كەتەيىك، بولاشاقتا قازاقستاندىق اۋە كومپانيالارى مۋمباي قالاسىنا تىكەلەي اۋە رەيستەرىن اشۋدى جوسپارلاپ وتىر.