رەسەيدىڭ ۇلكەن تەاترى «استانا وپەرا» ساحناسىندا ونەر كورسەتەدى
«قازاقستاننىڭ ەڭبەك سىڭىرگەن قايراتكەرى اسقار بورىبايەۆ «استانا وپەرا» سيمفونيالىق وركەسترىنە ديريجەرلىك ەتەدى. سونىمەن قاتار كورەرمەن قاۋىمدى رەسەي ۇلكەن تەاترىنىڭ ءسوليسى مارينا مينينا جانە دارىندى جاس سكريپكاشى جاندوس مۇحامەديمەن كەرەمەت كەزدەسۋ كۇتۋدە»، - دەلىنگەن حابارلامادا.
فورتەپيانو پارتياسىن «استانا وپەرا» تەاترى وپەرا ترۋپپاسىنىڭ باس كونسەرتمەيستەرى، «مادەنيەت قايراتكەرى» ەلەنا ساحنو ورىندايدى.
باعدارلاماعا الەمدىك كامەرالىق-ۆوكالدىق مۋزىكا جاۋھارلارى ەنگەن. العاش رەت «استانا وپەرا» ساحناسىندا گرەك كومپوزيتورلارى ميكيس تەودوراكيس، مانوس حادزيداكيس پەن ستاۆروس كسارحاكوستىڭ ۆوكالدىق تۋىندىلارى شىرقالادى.
حالىقارالىق بايقاۋلاردىڭ لاۋرەاتى مارينا مينينا 20 جىلدان استام ۋاقىت بويى رەسەي ۇلكەن تەاترىنىڭ وپەرا ترۋپپاسىندا ەڭبەك ەتۋدە. ۇلكەن تەاتردىڭ بارلىق قويىلىمدارى مەن الەم بويىنشا وتكەن گاسترولدەرىنە تابىستى قاتىسقان. 2014-جىلدان باستاپ «Globus Music International» كونە مۋزىكا ءانسامبلىنىڭ سوليسى بولىپ تابىلادى.
حالىقارالىق بايقاۋلاردىڭ لاۋرەاتى جاندوس مۇحامەدي مەن «استانا وپەرا» سيمفونيالىق وركەسترىنىڭ ورىنداۋىندا قازاق مۋزىكاسىنىڭ كلاسسيگى احمەت جۇبانوۆ پەن يسپان كومپوزيتورى پابلو ساراساتەنىڭ شىعارمالارى كورەرمەنگە جول تارتادى.
- يسپان سكريپكاشىسى ءارى كومپوزيتورى پ. ساراساتە سكريپكالىق ونەرگە ارناپ تاماشا تۋىندى جاسادى. سكريپكامەن وركەسترگە ارنالعان ينترودۋكتسيا مەن تارانتەللانى كلاسسيكالىق مۋزىكانىڭ جاۋھارى دەپ اتاۋعا بولادى. ساراساتە سكريپكامەن ءان سالعاندا تىڭداۋشىلارى شاتتىققا بولەنگەن. ول يسپان حالىق بيلەرىنىڭ كوركەم سۋرەتتەرىن «بەينەلەگەن»، ال تىڭدارماننىڭ قيالىندا ولار جان بىتكەندەي اسەردە بولعان. قالا تۇرعىندارى مەن قوناقتارىنا وسىناۋ شۋاقتى كوكتەمنىڭ كەشىندە كەرەمەت مۋزىكادان تولىققاندى ءلاززات الىپ، راحاتتانۋىنا تىلەكتەسپىن، - دەيدى سكريپكاشى جاندوس مۇحامەدي.
ەسكە سالار بولساق، ماەسترو اسقار بورىبايەۆ ۇزاق جىلدار بويى گرەكيادا جۇمىس جاساعان. الەمنىڭ كوپتەگەن ەلدەرىندە كونتسەرت بەرگەن. «كونچەرتونە» كامەرالىق وركەسترىنىڭ نەگىزىن قالادى. اسقار ىسمايىل ۇلىنىڭ ۇستازدىق قىزمەتى دە تابىستى جۇزەگە استى - ونىڭ شاكىرتتەرى كورنەكتى مۋزىكانتتار، مادەنيەت قايراتكەرلەرى اتاندى. قازىرگى تاڭدا ديريجەر رەتىندە بەلسەندى كونتسەرتتىك قىزمەتىن اتقارۋدا. سيمفونيالىق وركەستردىڭ ورىنداۋىندا قازاقستاندىق، گرەك جانە باتىس ەۋروپالىق كومپوزيتورلاردىڭ تۋىندىلارى شىرقالادى.
