ۇلى جىبەك جولى تۋريستەرىنە ءبىرىڭعاي ۆيزا بەرىلۋى مۇمكىن
«بۇل باستامانى بارلىق قاتىسۋشى ەلدەر قولداپ وتىر. ولاردىڭ سانى 30 دان اسادى. ۇلى جىبەك جولى - اۋقىمدى جوبا، ەۋرازيا قۇرلىعىنىڭ ۇلكەن بولىگى. ونىڭ اۋماعى شىعىستاعى جاپونيادان ەۋروپانىڭ شىعىسىنداعى يتالياعا دەيىن سوزىلىپ جاتىر. شىن مانىندە بۇل باستاما بارلىق ەلگە قاتىستى، دەگەنمەن باستاپقىدا بۇل يدەيانى ورتالىق ازيا ەلدەرى اراسىندا ىسكە اسىرىپ كورگىمىز كەلەدى» ، - دەدى «Visit Uzbekistan» جوباسىنىڭ ديرەكتورى ميحايل شامشيدوۆ استانا ءوتىپ جاتقان قازاقستان- وزبەكستان تۋريستىك فورۋمىندا.
م. شامشيدوۆتىڭ ايتۋىنشا، تۋريزم سالاسىندا وزبەكستان مەن قازاقستان ءبىر- بىرىنە باسەكەلەس بولا المايدى. سەبەبى، وزبەكستان - وتىرىقشى ەل رەتىندە تۋريستەرگە كونە قالالارىن ۇسىنسا، قازاقستان ەجەلگى كوشپەلى مادەنيەتىمەن ەرەكشەلەنبەك.
بۇعان دەيىن قازاقستان مەن وزبەكستاننىڭ تۋريستەر ءۇشىن ورتاق ۆيزا شىعاراتىنى حابارلانعان ەدى.
«Kazakh Tourism» باسشىسى راشيد كۇزەمبايەۆتىڭ ايتۋىنشا، جىل سوڭىنا دەيىن ءبىرىڭعاي ۆيزا ەنگىزۋ جۇمىستارى ناتيجەسىن بەرەدى. الماتى- تاشكەنت- بۇحارا- سامارقان باعىتى بويىنشا ەكونوم- رەجىمدەگى ساياحات شامامەن 500 دوللاردى قۇراماق.
«الداعى ۋاقىتتا تاجىكستان مەن قىرعىزستان دا بۇل باستاماعا قوسىلۋى مۇمكىن. مۇندا اكىمشىلىك ماسەلەلەر جوق، دەگەنمەن سىرتقى ساياسي جانە ۇلتتىق قاۋىپسىزدىككە قاتىستى ءبىرقاتار كۇردەلى ماسەلەلەر بار» ، - دەپ تولىقتىردى ءسوزىن ر. كۇزەمبايەۆ.
