تاشكەنتتە تولە ءبي كەسەنەسىنىڭ سالىنۋىن ماقتان تۇتامىز - وزبەكستان پرەزيدەنتى
«جاقىندا ارنايى قاۋلى قابىلداندى. وعان سايكەس، قازاق حالقىنىڭ ۇلى اقىنى، ويشىل ءارى گۋمانيست اباي قۇنانبايەۆتىڭ مۇراسى تەرەڭ زەرتتەلىپ، كەڭىنەن ناسيحاتتالۋى ءتيىس»، - دەدى وزبەكستان پرەزيدەنتى شاۆكات ميرزيەيەۆ قازاقستانداعى وزبەكستان جىلىنىڭ اشىلۋ سالتاناتىندا.
ءوز سوزىندە ش. ميرزيەيەۆ ەكى ەلدىڭ باۋىرلاس بايلانىستارىن تىلگە تيەك ەتىپ، تاشكەنت قالاسىنداعى تولە ءبيدىڭ كەسەنەسىن دە ەسكە الدى.
«ءبىز تولە ءبي كەسەنەسىنىڭ تاشكەنت قالاسىندا سالىنعانىن ماقتان تۇتامىز. ول جەرگە وزبەكتەر دە، باۋىرلاس قازاقتار دا بارىپ، ءتاۋ ەتەدى. ءالى ەسىمدە، ءسىز، قۇرمەتتى نۇرسۇلتان ءابىش ۇلى، وزبەكستانعا مەملەكەتتىك ساپارمەن كەلگەندە ءبىز بىرگە سول قاسيەتتى جەرگە بارىپ، ەكى ەلدىڭ حالقىن تاتۋلىق مەن بەيبىتشىلىكتە ءومىر سۇرۋگە ۇندەگەن ۇلى تۇلعانى ەسكە الدىق. مەن ويلايمىن، اتا-بابالارىمىز ءبىزدىڭ قازىرگى دوستىعىمىزدى، شىنايى ءارى اشىق بايلانىستارىمىزدى كورگەندە قۋاناتىن ەدى. بارىمىزگە - قازاقتارعا، قىرعىزدارعا، تۇركىمەندەرگە، تاجىكتەر مەن وزبەكتەرگە، جالپى، ورتالىق ازيادا تۇراتىن ۇلت پەن ۇلىستارعا تاتۋلىقتا ءومىر ءسۇرۋدى جازعان ەكەن. بۇل - تاعدىردىڭ جازۋى. سوعان بار كۇش- جىگەرىمىزدى سالىپ، ورتاق ءۇيىمىزدى قورعاۋىمىز قاجەت»، - دەپ اتاپ كورسەتتى ش. ميرزيەيەۆ.
ايتا كەتەيىك، سالاتاناتتى شارا بارىسىندا ن. نازاربايەۆ وزبەكستان پرەزيدەنتىن «دوستىق» وردەنىمەن ماراپاتتادى. الداعى ۋاقىتتا استانادا الىشەر ناۋايدىڭ ەسكەرتكىشى ورناتىلادى.
