11:27, 15 - ناۋرىز 2018 | GMT +6
ياكۋتيادا قازاقستان مادەنيەتى مەن ادەبيەتىنىڭ ورتالىعى اشىلادى
استانا. قازاقپارات - ساحا رەسپۋبليكاسىنىڭ (ياكۋتيا) ۇلتتىق كىتاپحاناسىندا قازاقستان مادەنيەتى مەن ادەبيەتىنىڭ ورتالىعى اشىلادى، دەپ حابارلايدى «قازاقپارات» ح ا ا ر ف- داعى ق ر ەلشىلىگىنىڭ سايتىنا سىلتەمە جاساپ.
ورتالىقتا ق ر پرەزيدەنتى نۇرسۇلتان نازاربايەۆتىڭ قىزمەتى جايلى كىتاپتار، ونىڭ حالىقارالىق ارەناداعى ورنى سونىمەن قاتار قازاق جازۋشىلارىنىڭ قازاق، اعىلشىن جانە ورىس تىلدەرىندەگى كىتاپتارى قويىلادى.
ورتالىققا 200 كىتاپ سىيعا تارتىلادى. كىتاپحانا قىزمەتكەرلەرى بۇل كىتاپتاردىڭ وقىرمانداردىڭ قىزىعۋشىلىعىن ارتتىراتىنىنا سەنىمدى. ولار قازاق حالقىنىڭ تاريحىمەن، مادەنيەتىمەن جانە سالت-داستۇرىمەن تەرەڭىرەك تانىسا الادى.
ساحا رەسپۋبليكاسىنىڭ (ياكۋتيا) ۇلتتىق كىتاپحاناسى رەسەيدىڭ سولتۇستىك-شىعىسىنداعى ءىرى ورتالىقتاردىڭ ءبىرى. كىتاپ قورى 1,6 ميلليون كولەمىندە. مۇندا نەگىزىنەن ورىس، ياكۋت جانە سولتۇستىكتەگى حالىقتاردىڭ تىلىندە شىققان كىتاپتار ساقتالعان.
