باكۋدە ەلباسىنىڭ «تاۋەلسىزدىك ءداۋىرى» كىتابى تانىستىرىلدى

باكۋ. قازاقپارات - باكۋ قالاسىنداعى قازاقستان ەلشىلىگىندە پرەزيدەنت نۇرسۇلتان نازاربايەۆتىڭ «تاۋەلسىزدىك ءداۋىرى» اتتى كىتابىنىڭ تۇساۋى كەسىلدى، دەپ حابارلايدى «قازاقپارات» ح ا ا ازەربايجانداعى مەنشىكتى ءتىلشىسى.

شاراعا قازاقستاننىڭ دوستارى كلۋبىنىڭ مۇشەلەرى، گ. اليەۆ اتىنداعى «ازەربايجان-قازاقستان» رەسپۋبليكالىق دوستىق قوعامىنىڭ اكتيۆى، ەلدەگى قوعامدىق-ساياسي، عىلىم جانە مادەنيەت سالاسىنىڭ مايتالماندارى سونداي-اق ب ا ق وكىلدەرى قاتىستى.

جيىندا ءسوز سويلەگەن قازاقستان ەلشىسى بەيبىت يسابايەۆ شاراعا كەلۋشىلەردى كىتاپتىڭ مازمۇنىمەن تانىستىرىپ، قازاقستاننىڭ تاۋەلسىزدىك العان جىلداردا قول جەتكىزگەن نەگىزگى 33 ناتيجەسى تۋرالى وسى كىتاپتا ايتىلاتىنىن جەتكىزدى.

ديپلومات كىتاپتاعى قازاقستاننىڭ تۇركى الەمى ەلدەرىمەن بىرلەسە اتقارعان جۇمىستارى، ونىڭ ىشىندە ازەربايجان مەن جۇرگىزىلگەن ەكىجاقتى قارىم-قاتىناستار تۋرالى تاراۋعا توقتالىپ ءوتتى.

قوناقتار «تاۋەلسىزدىك ءداۋىرى» كىتابىن جاڭا زامانداعى ساياساتتانۋ تۇرعىسىنان جوعارى باعالادى.

گ. اليەۆ اتىنداعى «ازەربايجان-قازاقستان» رەسپۋبليكالىق دوستىق قوعامىنىڭ پرەزيدەنتى، پروفەسسور ەلدار گيۋنايدىڭ ايتۋىنشا، قازاقستان پرەزيدەنتىنىڭ بۇل ەڭبەگى ەل تاعدىرىنا بەي-جاي قاراي المايتىن كەز كەلگەن ادامنىڭ قالتا كىتابىنا اينالۋى كەرەك. سەبەبى بۇل كىتاپتا وتكەنگە باعا بەرىلىپ، بۇگىنگى كۇن مەن الداعى 50 جىلدىق دامۋدىڭ تۇجىرىمداماسى ايقىن كورسەتىلگەن.

باكۋدەگى سلاۆيان ۋنيۆەرسيتەتىنىڭ پروفەسسورى نيزامي مامەدوۆ-تاگيسويدىڭ ايتۋىنشا، قازاقستان پرەزيدەنتىنىڭ بۇل ەڭبەگى تۇركى حالىقتارىنىڭ بارىنە قاجەت ورتاق كىتاپ بولماق.