وزبەكستان پرەزيدەنتى ابايدى ناسيحاتتاۋ تۋرالى قاۋلىعا قول قويدى
قۇجاتتا ۇلى اقىن جانە ويشىل اباي قۇنانباي ۇلىنىڭ ەسىمى مەن مول شىعارماشىلىق مۇراسى قازاق حالقىنىڭ عانا ەمەس، بارشا تۇركى حالىقتارىنىڭ، ونىڭ ىشىندە وزبەك حالقىنىڭ رۋحاني دامۋ تاريحىندا وشپەس ءىز قالدىرعانى ايتىلعان. اباي قۇنانباي ۇلىنىڭ ءومىر جولى، ونىڭ قايتالانباس شىعارماشىلىعى وتانعا، ۇلتتىق جانە جالپى ادامزاتتىڭ قۇندىلىقتارىنا دەگەن ادالدىقتىڭ جارقىن ۇلگىسى بولىپ قالا بەرەدى.
«ەكى حالىقتىڭ دوستىعى مەن باۋىرلاستىعىنىڭ نىعايۋىنا ەلەۋلى ۇلەس قوسقانىن ەسكەرە وتىرىپ جانە وزبەكستان قوعامىنىڭ قازاق ادەبيەتى مەن ونەرىن تەرەڭىرەك تانۋى ءۇشىن مادەني- گۋمانيتارلىق بايلانىستاردى دامىتۋ ماقساتىندا وزبەكستاندا اباي قۇنانباي ۇلىنىڭ شىعارماشىلىق مۇراسىن كەڭىنەن زەرتتەۋ مەن ناسيحاتتاۋ تۋرالى ۇسىنىس ماقۇلدانسىن»، - دەلىنگەن قۇجاتتا.
قاۋلىعا سايكەس، ۇلى اقىن جانە ويشىل اباي قۇنانباي ۇلىنىڭ شىعارماشىلىق مۇراسىن كەڭىنەن زەرتتەۋ مەن ناسيحاتتاۋ بويىنشا ۇيىمداستىرۋ كوميتەتىنىڭ قۇرامىن بەكىتۋ جوسپارلانۋدا. سونداي- اق، ۇيىمداستىرۋ كوميتەتىنە ءبىر ايلىق مەرزىمدە شارالار ءتىزىمىنىڭ جوسپارىن ازىرلەۋ تاپسىرىلدى.
سونىمەن بىرگە، قۇجاتتا ابايدىڭ «تاڭدامالى» شىعارمالار جيناعىن جانە «وزبەك- قازاق ادەبي بايلانىستارى» ادەبي- ساراپتامالىق ماقالالار جيناعىن ازىرلەپ، باسپاعا بەرۋ ۇسىنىلعان.
نيزامي اتىنداعى تاشكەنت مەملەكەتتىك پەداگوگيكالىق ۋنيۆەرسيتەتىندەگى «اباي جانە وزبەك ادەبيەتى» كورمەسىن تۇراقتى تۇردە ۇيىمداستىرۋ جانە جىل سايىن 10 -تامىزدا - ابايدىڭ تۋعان كۇنىندە تاشكەنتتەگى اقىن ەسكەرتكىشى جانىندا سالتاناتتى شارالار وتكىزۋ، وقۋشىلار مەن ستۋدەنتتەر اراسىندا «اباي شىعارمالارىنىڭ بىلگىرى» شىعارمالار بايقاۋىن ۇيىمداستىرۋ ۇسىنىلىپ وتىر.
ودان بولەك، اقىننىڭ ءومىرى مەن شىعارماشىلىعى تۋرالى ماقالالار مەن تەلە، راديوماتەريالدار ازىرلەۋ، وقۋ ورىندارىنداعى مەكتەپتەردە، اسكەري بولىمدەر مەن ۇجىمداردا تاقىرىپتىق كەشتەر وتكىزۋ قاراستىرىلعان.
