ن. نىعماتۋلين مەن وڭتۇستىك كورەيا پارلامەنتىنىڭ ءتوراعاسى ىنتىماقتاستىق كەلىسىمىنە قول قويدى
تاراپتار ەكى ەل اراسىنداعى ساۋدا-ەكونوميكالىق، حالىقارالىق، مادەني-گۋمانيتارلىق، سونىمەن بىرگە، پارلامەنتارالىق ىنتىماقتاستىقتىڭ وزەكتى سۇراقتارىن تالقىلادى.
ءماجىلىس ءتوراعاسى كورەيا رەسپۋبليكاسىنىڭ شىعىس ازياداعى ماڭىزدى ستراتەگيالىق ارىپتەسى ەكەنىن ايتتى.
كەزدەسۋدە قازاقستان پرەزيدەنتىنىڭ دامىعان ەل قاتارىنا كىرۋ جولىنداعى ستراتەگيالىق ماڭىزدى باستامالارىن ءسوز ەتكەن، ن. نىعماتۋلين ولاردى زاڭنامالىق تۇرعىدان قامتاماسىز ەتۋ جايىنا ايرىقشا نازار اۋداردى.
ءماجىلىس سپيكەرىنىڭ پىكىرىنشە، كورەيا رەسپۋبليكاسى سيفرلىق تەحنولوگيا، يننوۆاتسيالىق دامۋ سالاسىندا الەمدىك كوشباسشىلاردىڭ ءبىرى. وسى رەتتە اتالعان ەل پارلامەنتىنىڭ ەكونوميكانى سيفرلاندىرۋ، كولىك جانە لوگيستيكا، دەنساۋلىق پەن ءبىلىم سالالارىندا يننوۆاتسيالىق تەحنولوگيانى ەنگىزۋدى زاڭنامالىق تۇرعىدان قامتاماسىز ەتۋ تاجىريبەلەرى زور قىزىعۋشىلىق تۋدىرادى.
وسى رەتتە مارتەبەلى مەيمان قازاقستاننىڭ ەڭ دامىعان 30 ەلدىڭ قاتارىنا كىرۋ ماقساتىن جاقسى بىلەتىنىن جانە قازاقستان پرەزيدەنتىنىڭ تەڭدەسسىز كوشباسشىلىعىن، ەلىمىزدىڭ جوعارى دامۋ قارقىنىن، باي رەسۋرستارىن ءسوز ەتە كەلىپ، قازاقستاننىڭ ول ماقساتقا جەتەتىنىنە ەرەكشە سەنىم ءبىلدىردى. جانە وسى ۇلكەن جولدا كورەيا قازاقستاننىڭ ەڭ جاقىن ارىپتەستەرىنىڭ ءبىرى بولىپ قالاتىنىن اتاپ ءوتتى.
سونداي-اق، ەلباسىنىڭ حالىقارالىق دەڭگەيدەگى ساليقالى ساياساتىنا ايرىقشا كوڭىل ءبولىپ، قازاقستان پرەزيدەنتى يادرولىق قارۋسىزدانۋ باعىتىنداعى باتىل ءارى ناقتى قادامدارىنىڭ ارقاسىندا ۇلگى بولىپ كەلە جاتقانىنا زور ريزاشىلىعىن ءبىلدىردى.
كەزدەسۋ بارىسىندا پارلامەنت وكىلدەرى قازاقستان رەسپۋبليكاسى پارلامەنتى ءماجىلىسى مەن كورەيا رەسپۋبليكاسى ۇلتتىق اسسامبلەياسى اراسىندا ىنتىماقتاستىق تۋرالى كەلىسىمگە قول قويدى.
العاش رەت جاسالىپ وتىرعان بۇل كەلىسىم، ءبىزدىڭ ەلدەرىمىزدىڭ ستراتەگيالىق ىقپالداستىعىن زاڭدىق تۇرعىدان قولداۋعا مۇمكىندىك بەرۋمەن قاتار، پارلامەنتتەر اراسىنداعى زاڭنامالىق تاجىريبەنى ودان ءارى ىنتالاندىرۋعا، حالىقارالىق ماسەلەلەر توڭىرەگىندە ورتاق ۇستانىمدى كۇشەيتۋگە زور ىقپال ەتەتىن بولادى.
وسى ورايدا نۇرلان نىعماتۋلين جانە چۋنگ سە گيۋن بەيىندى كوميتەتتەر مەن ىنتىماقتاستىق جونىندەگى توپتار ارقىلى ءجيى ءىس-قيمىل الماسىپ، پارلامەنتتەر ارىپتەستىگىن جاڭا دەڭگەيگە كوتەرۋدىڭ ماڭىزدىلىعىنا توقتالدى.
جۇزدەسۋ بارىسىندا ەۋرازيا ەلدەرى پارلامەنتتەرى سپيكەرلەرىنىڭ سەۋل جينالىسى دا نازاردان تىس قالمادى.
تاراپتار، بۇگىندە بۇل فورۋمنىڭ كۇن تارتىبىندەگى ماڭىزدى سۇراقتاردى تالقىلاۋدىڭ قوسىمشا ءۇن قاتىسۋ الاڭىنا اينالعانىن ايتىپ، 2019-جىلى اتالعان باس قوسۋدىڭ ءتورتىنشى جينالىسىن ۇيىمداستىرۋ قاجەتتىلىگىنە كوڭىل ءبولدى.
