ارزان يپوتەكانى ءۇش جاقتى كەلىسىمشارتپەن بەرۋگە بولادى - ەكونوميست
ەكونوميست باۋىرجان ىسقاقوۆتىڭ ويىنشا، بۇگىندە ەكىنشى دەڭگەيلى بانكتەر ءۇشىن حالىققا 7 پروتسەنتتىك يپوتەكانى بەرگەن ءتيىمسىز. سول سەبەپتى ونداي نەسيەلەر ەشبىر دەلدالسىز تىكەلەي حالىققا تاراتىلۋى ابدەن مۇمكىن.
«ول ءۇشىن پرەزيدەنت ۇلتتىق بانكتىڭ جانىنان ارنايى قارجى ينستيتۋتىن قۇرۋدى تاپسىردى. نەگىزى، بىزدە ونداي ينستيتۋت بار. ول - قازاقستاننىڭ يپوتەكالىق كومپانياسى. بىزگە ونىڭ قىزمەتىن قايتالايتىن تاعى ءبىر كومپانيانىڭ قاجەتى جوق. سوندىقتان بۇل ماسەلە «نۇرلى جەر» باعدارلاماسىنا وزگەرىس ەنگىزىپ، قازاقستاننىڭ يپوتەكالىق كومپانياسىنىڭ جارعىلىق كاپيتالىن ۇلعايتۋ ارقىلى شەشىلەتىن شىعار»، - دەدى ب. ىسقاقوۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، ارزان يپوتەكانى ءۇش جاقتى كەلىسىمشارتپەن بەرۋگە بولادى. يپوتەكالىق كومپانيا ءۇيدىڭ اقشاسىن قۇرىلىس كومپانياسىنا اۋدارادى. ال پاتەردى العان ادام اقشانى كومپانيانىڭ وزىنە تولەپ وتىرادى.
«بۇل جەردە مەملەكەتتىڭ اقشاسىن قۇرىلىس كومپانياسىنىڭ تىكەلەي وزىنە، ياعني دەلدالسىز اۋدارعان دۇرىس. سەبەبى ءاربىر دەلدالدىڭ ءوزىنىڭ مارجاسى بولادى. ول دا - تۇتىنۋشىعا تۇسەتىن قوسىمشا سالماق. سوندىقتان بۇل جەردە ءۇشجاقتى كەلىسىمشارت ەشبىر دەلدالسىز بولۋى قاجەت. يپوتەكالىق كومپانيا قۇرىلىستىڭ اقشاسىن تولەيدى دە، پاتەرلەردى كەپىلزاتقا قويادى. ال ونى العان ادامدار 7 پروتسەنتپەن يپوتەكانى تولەپ وتىرادى. نەگىزى، مەحانيزمى وتە قاراپايىم»، - دەيدى ب. ىسقاقوۆ.
ەكونوميستىڭ سوزىنە قاراعاندا، حالىق تاراپىنان جاڭا باعدارلاما اياسىندا سالىناتىن باسپاناعا سۇرانىس جوعارى بولادى. ەندىگى ماسەلە، وسى ساناتتاعى تۇرعىن ۇيلەردىڭ ساپاسىن قاتاڭ باقىلاۋدى ۇستاۋ قاجەت. «سوسىن ارزان يپوتەكا تەك دايىن ۇيلەرگە عانا بەرىلۋى كەرەك. ونسىز سپەكۋلياتيۆتى ارەكەتتەر بولۋى ابدەن مۇمكىن»، - دەپ اتاپ كورسەتتى ب. ىسقاقوۆ.
ايتا كەتەيىك، وتكەن اپتادا ق ر پرەمەر- مينيستر باقىتجان ساعىنتايەۆ «7-20-25» باعدارلاماسىن ىسكە اسىرۋ تەتىكتەرىن ازىرلەۋدى تاپسىردى.
فوتو: zhetysu.gov.kz
اۆتور: ارمان اسقاروۆ
