12:28, 10 - ناۋرىز 2018 | GMT +6
قىتايدا مەكتەپتەردەگى ەمتيحانعا ديماش قۇدايبەرگەن تۋرالى سۇراقتار ەنگىزىلدى
استانا. قازاقپارات - قىتايدىڭ وقۋ مەكەمەلەرىندەگى اعىلشىن ءتىلى بويىنشا تەستتىك تاپسىرمالارعا ديماش قۇدايبەرگەن تۋرالى سۇراقتار ەنگىزىلدى، دەپ حابارلايدى قازاقپارات الەۋمەتتىك جەلىدەگى اقپاراتقا سىلتەمە جاساپ.
اتالعان تەست سۇراعىن قىتايلىق بلوگەر شي حۋاي شىڭ (C-huai槐笙) ۆەيبوداعى جەكە پاراقشاسىندا جاريالادى.
تاپسىرمادا اعىلشىن تىلىندە تانىمال ءانشى ديماشقا قاتىستى سۇراقتار بەرىلەدى. ءانشىنىڭ تۋعان جەرى، بالالىق شاعى، حوببيى، العاشقى جەتىستىكتەرى ونىڭ ىشىندە «سلاۆيان بازارى» جانە «ى am a singer» جوبالارىندا قالاي جەتىستىككە جەتكەنى ايتىلادى.
«ونىڭ داۋىسى ادەمى، ءتۇر- سىمباتى دا كەلىستى، سوندىقتان ول قىتايدا ۇلكەن تانىمالدىققا يە بولدى. فرانتسۋز تىلىندە ورىنداعان انىنەن كەيىن ديماشتىڭ Weibo (قىتايداعى فەيسبۋكتىڭ بالاماسى - اۆت. ) جەلىسىندەگى وقىرماندارى 300000 ادامعا جەتتى»، - دەپ جازادى الەۋمەتتىك جەلى قولدانۋشىسى.