09:52, 10 - ناۋرىز 2018 | GMT +6
قازاقستاندىق بالۋان حالىقارالىق گران پريدە «التىن» الدى
استانا. قازاقپارات - ماروككودا (اگادير) ءوتىپ جاتقان گران پري تۋرنيرىندە قازاقستاندىق دزيۋدوشى عۇسمان قىرعىزبايەۆ (60 ك گ) فينالدا تۇرىك بالۋانى وزلۋ بەكيردى جەڭىپ، جارىس جەڭىمپازى اتاندى.
بۇل تۋرالى قازاقپارات دزيۋدو فەدەراتسياسىنىڭ سايتىنا سىلتەمە جاساپ حابارلايدى.
60 كەلىگە دەيىنگى سالماقتا سىنعا تۇسكەن قازاقستاندىق عۇسمان قىرعىزبايەۆ جارىسقا ەكىنشى اينالىمدا قوسىلىپ، العاشقى قارسىلاسى سلوۆەنيالىق دەۆيد ستاركەلدەن باسىم ءتۇستى.
ءوزىنىڭ ەكىنشى بەلدەسۋىندە ماروككولىق دجەۆي موحاممەدتەن ايلاسىن اسىرعان وتانداسىمىز جارتىلاي فينالعا جولداما الدى.
جارتىلاي فينالدا تاتامي يەسى ياسين موۋداتيردى يپپونمەن جەڭىپ، فينالعا شىققان بولاتىن.
ەسكە سالا كەتەيىك، قازاقستاندىق دزيۋدوشىلار ماروككوداعى گران پري كەزەڭىندە ونەر كورسەتەتىندىگى تۋرالى بۇعان دەيىن حابارلاعان بولاتىنبىز.
