تۇرعىن ءۇي قۇرىلىس جيناق بانكىنىڭ تالاپتارى وزگەرۋى مۇمكىن
قۇرىلىس ىستەرى جانە تۇرعىن ءۇي كوممۋنالدىق شارۋاشىلىق كوميتەتىنىڭ ءتوراعاسى مارحابات جايىمبەتوۆتىڭ ايتۋىنشا، «7-20-25» باعدارلاماسى بولەك يپوتەكالىق باعىت رەتىندە قولعا الىنۋى ابدەن مۇمكىن. ال «نۇرلى جەر» باعدارلاماسىنا كىرەتىن تۇرعىن ءۇي قۇرىلىس جيناق بانكى مەن قازاقستاننىڭ يپوتەكالىق كومپانياسى بۇرىنعىداي جۇمىس ىستەي بەرەدى. دەگەنمەن، وسى سالاداعى باسەكە قىزا تۇسەدى. سوندىقتان «نۇرلى جەردىڭ» قازىرگى تالاپتارى قايتا قارالماقشى.
«ماسەلەن، قازاقستاننىڭ يپوتەكالىق كومپانياسى جاڭا باعدارلامانىڭ شارتتارىنا شىداي الا ما، جوق پا، ونى ايتۋ قيىن. دەگەنمەن، ءبىز تۇرعىن ءۇي قۇرىلىس بانكىنىڭ دە، قازاقستاننىڭ يپوتەكالىق كومپانياسىنىڭ دا جۇمىسىن قايتادان قارايمىز. ەندى، ول جەردەگى بەرىلەتىن نەسيەلەردىڭ جاعدايىن دۇرىستاۋ كەرەك، جەڭىلدەتۋىمىز كەرەك»، - دەدى م. جايىمبەتوۆ قازاقپارات تىلشىسىنە بەرگەن سۇحباتىندا.
ايتا كەتەيىك، پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ قازاقستاندىقتاردى باسپانامەن قامتاماسىز ەتۋدىڭ جاڭا باعدارلاماسىن ازىرلەۋدى تاپسىردى. وسىعان بايلانىستى ق ر ۇلتتىق بانكى جانىنان 7 پروتسەنتتىك يپوتەكانى بەرەتىن جاڭا كومپانيا قۇرىلادى. ق ر ينۆەستيتسيالار جانە دامۋ ءمينيسترى جەڭىس قاسىمبەكتىڭ ايتۋىنشا، ارزان يپوتەكا بارىنە جەتەدى. مينيسترلىكتىڭ ەسەبىنە سايكەس، «7-20-25» باعدارلاماسى ارقاسىندا قازاقستاندىقتاردىڭ ءبىرازى باسپانا ماسەلەسىن شەشە الادى.
اۆتور: ارمان اسقاروۆ
