نۇرلان ءابدىروۆ: مەملەكەتتە بەس الەۋمەتتىك باستامانى ىسكە اسىراتىن قاراجات بار
«11 ميلليون شارشى مەتر تۇرعىن ءۇي (ءبىر جىلدا - اۆت.) سالىندى. پرەزيدەنت ءوز سوزىندە بۇل اۋقىمنىڭ جەتپەيتىنىن اتاپ ءوتتى. بىرنەشە جىل بۇرىن جىلىنا 6 ميلليون شارشى مەتر سالىنسا، بۇل ايتارلىقتاي كەرەمەت كورسەتكىش رەتىندە سانالاتىن. بۇگىنگى كۇنى 11 ميلليون شارشى مەتر ماسەلەنى شەشپەي تۇر. سوندىقتان، بانكتەردىڭ قولجەتىمدى نەسيەلەرى البەتتە، كوبەيەدى. ادامداردىڭ باسىم بولىگىندە «ارماندى جاقىنداتىپ، ونى شىنايىلىققا اينالدىرۋعا» مۇمكىندىك تۋادى»، - دەدى ماجىلىسمەن.
دەپۋاتتىڭ پايىمداۋىنشا، گاز قۇبىرلارىنىڭ سالىنۋىنىڭ دا ماڭىزى زور.
«جاسىراتىنى جوق، الەۋمەتتىك جەلىلەردەن- اق استانانىڭ اسپانىن قانشالىقتى ءتۇتىن باسىپ كەتكەنىن كورىپ وتىرامىز. ۋاقىتى كەلگەندە مۇنىڭ ءبارى وتكەن كۇننىڭ ءبىر پاراسى بولىپ قالاتىن كەز تۋار. سەبەبى، قاتتى وتىنداردىڭ اۋاعا تارالۋى التى ەسەگە ازايسا، بۇل ءبىرشاما ماسەلەنىڭ شەشىلەتىنىنەن حابار بەرىپ تۇرعان جوق پا!؟ ءبىزدىڭ سىزدەرمەن بىرگە ەلوردادا جاعدايىمىز جاقسارا تۇسەدى. گاز قۇبىرلارى بويىنشا ايتىلعان جۇمىس 2,5 ميلليون ادامنىڭ ءومىرىن قامتيدى. مۇنى دا ەسكەرەيىك»، - دەدى ول.
نۇرلان ءابدىروۆ سونىمەن قاتار، زاڭگەر رەتىندە ءبىر ماسەلەگە نازار اۋداراتىنىن تىلگە تيەك ەتتى.
«ەلباسى بۇگىن ءوز ءسوزىن اياقتار تۇستا كونستيتۋتسيا بويىنشا ءبىز ءبارىمىز بىرلەسىپ الەۋمەتتىك مەملەكەت قۇرىپ جاتقانىمىزدى اتاپ ءوتتى. بەلگىلەنگەن بەس الەۋمەتتىك باستاما - ەڭ الدىمەن قازاقستان الەۋمەتتىك مەملەكەتتىڭ ىرگەسىن قالاۋعا باعىتتالعان. ەكىنشىدەن، دەپۋتاتتارعا ءتيىستى زاڭداردى قابىلداپ، تەزىرەك وسى پرەزيدەنتتىك الەۋمەتتىك باستامالاردى جۇزەگە اسىرۋ مىندەتتەلدى. وزدەرىڭىز ەستىگەندەي، پرەزيدەنت «ءبارىنىڭ ەسەپتەلىپ وتىرعانىن» ەرەكشە اتاپ ءوتتى. دەمەك، بۇل الەۋمەتتىك باستامالاردى جۇزەگە اسىرۋ ماقساتىندا ناقتى قارجى مەملەكەتتە بار. وسى جۇمىستاردى ىسكە اسىرۋعا پرەزيدەنت بيزنەستى اتسالىسۋعا شاقىردى»، - دەپ ءتۇيدى نۇرلان ءابدىروۆ.
اۆتور: ايان بەكەن ۇلى
