لەۆيت تيشەنكونى قوناققا شاقىردى: ءبىز، قازاقتار - قوناقجاي حالىقپىز
ول رينگكە قاشان ورالاتىنىن، ريو-دا-جانەيرو وليمپياداسىندا ءوزىن جەڭگەن رەسەيلىك بوكسشى ەۆگەني تيشەنكوعا كوزقاراسىن، بۇگىن نەمەن اينالىسىپ جاتقانىن جانە كەلەشەك جوسپارلارى تۋرالى ايتتى. سونداي-اق گولوۆكين مەن كانەلونىڭ الداعى رەۆانشىنا قاتىستى پىكىر ءبىلدىردى، دەپ حابارلايدى قازاقپارات sports.kz سايتىنا سىلتەمە جاساپ.
ءوز سۇحباتىندا بوكسشى تيشەنكونى وزگە قارسىلاستارمەن بىردەي كورەتىنىن، ەشكىمدى ءبولىپ جارىپ قارامايتىنىن اتاپ ءوتتى. سونداي-اق ول رەسەيلىك بوكسشىنى كەزدەيسوق كەزدەسىپ قالعان جاعدايدا، ونى قوناققا شاقىراتىنىن ايتتى.
«ءبىز، قازاقتار - قوناقجاي حالىقپىز عوي! ارينە، ونى ۇيگە شاقىرامىن. بۇل قالىپتان تىس جاعداي ەمەس»، - دەدى ول.
لەۆيت حالىقارالىق وليمپيادا كوميتەتىنىڭ تيشەنكو ەكەۋىنىڭ اراسىنداعى جەكپە-جەكتى قايتا قارايتىنى تۋرالى رەسمي مالىمدەمەسىنە اسا ءمان بەرمەيتىنىن جەتكىزدى.
«مەن بۇل تۋرالى وقىدىم. ءبىراق اسا قاتتى ءمان بەرمەدىم. قايتا قاراسا - قارار، بولماسا - جوق. قازىر باسىمدا باسقا نارسەلەر تۇر: جاڭا ماۋسىم باستالدى. جاڭا جىل، جاڭا ماقساتتار قويىپ وتىرمىز، جاتتىعۋدامىز. قازىر تەك وسى تۋرالى ويلايمىن. ار جاعىن ءبىر قۇداي كورسەتەر»، - دەدى ول.
سپورتشى 2018-جىلدىڭ 18- تامىزى مەن 2- قىركۇيەگى ارالىعىندا يندونەزيادا وتەتىن ازيا ويىندارىندا بوي كورسەتۋى مۇمكىن. ال نەگىزگى ماقساتى - 2020-جىلعى توكيو وليمپياداسىنا قاتىسۋ.
سونداي-اق ول اۋەسقوي بوكستا قالۋ شەشىمى تۋرالى ايتتى. «وعان ەش وكىنبەيمىن. بولارى بولدى. ءوز جولىمدى تاڭدادىم. كاسىپقويلاردىڭ قاتارىنا قوسىلعىم كەلمەيدى. قيىن ەمەس پە؟، دەپ سۇراساڭىز. كەز كەلگەن ماماندىق قيىن. ءبىراق بەلگىلى ءبىر جاعدايلارعا، سەبەپتەرگە بايلانىستى كاسىپقوي بوكستاعى كارەرانى تاڭدادىم»، - دەدى لەۆيت.
بۇدان بولەك، ول گەننادي گولوۆكين مەن ساۋل الۆارەس اراسىندا 5- مامىر كۇنى وتەتىن رەۆانشقا قاتىستى پىكىرىن ءبىلدىردى.
«بوكستا، ونىڭ ۇستىنە، مىناداي ايقاستا قانداي دا ءبىر بولجامدار جاساۋ قيىن. ناقتى ەشتەڭە ايتپايمىن. ءبىرىنشى جەكپە-جەك تاماشا ءوتتى. ماعان ۇنادى. مەنىڭ قاراپايىم پىكىرىم: جەڭىستى ءبىزدىڭ بوكسشىعا بەرەر ەدىم»، - دەدى سپورتشى.
