قىتاي توقىما ونىمدەرىن اقتاۋ پورتى ارقىلى تاسىمالداماق

اقتاۋ. قازاقپارات - اقتاۋ كولىك-لوگيستيكالىق حاب قۇرۋعا وتە ىڭعايلى ايماق. بۇل تۋرالى ق ح ر- نىڭ جياڭسۋ پروۆينتسياسى چانجۋ قالاسىنىڭ گۋبەرناتورى شەن يتسزيۋن ايتتى، دەپ حابارلايدى قازاقپارات.

اقتاۋعا قىتاي دەلەگاتسياسىن باستاپ كەلگەن شەن يتسزيۋن چانجۋ قالاسىنىڭ الەمنىڭ كوپتەگەن مەملەكەتتەرىنە كەڭ اۋقىمدا توقىما ونىمدەرىن تاسىمالدايتىنىن ايتتى. ونىڭ پىكىرىنشە، مۇندا توقىما ونىمدەرىن شىعارۋعا ارنالعان ماشينا قۇرىلىسى كاسىپورىندارى شوعىرلانعان.

«ترانكاسپي حالىقارالىق كولىك ءدالىزىنىڭ (ت ح ك د) اياسىندا اقتاۋ پورتى ارقىلى جۇك 2017-جىلى دا تاسىمالدانعان بولاتىن، ەندى قىتاي تاراپى وسى باعىتتى دامىتۋدى كوزدەپ وتىر»، - دەيدى شەن يتسزيۋن.

ونىڭ سوزىنشە، قىتاي دەلەگاتسياسى تاپ وسى ماقساتتا ماڭعىستاۋعا كەلىپ، وبلىس باسشىلىعىمەن جۇزدەسكەن. «اقتاۋدا حالىقارالىق ساۋدانى دامىتۋ ءۇشىن كولىك-لوگيستيكالىق حاب سالۋعا جانە ءوزارا ءتيىمدى ساۋدانى جەتىلدىرۋگە قاجەتتى مۇمكىنىكتەردىڭ ءبارى بار»، - دەدى شەن يتسزيۋن.

قىتاي وكىلى سونىمەن قاتار 2018-جىلى چانجۋ ءوزىنىڭ ونىمدەرىن اقتاۋ ارقىلى ەكسپورتتاۋدى كوزدەپ وتىرعانىن جەتكىزدى.

«وسى رەتتە ءبىز ءۇشىن قىزمەت كورسەتۋدىڭ ساپاسى مەن جۇكتىڭ ساپالى ءارى جەدەل الىپ، سالىنۋى ماڭىزدى. بولاشاقتا ءبىز جۇكتەردى ءتۇرلى باعىتتار بويىنشا تاسىمالداۋ ءۇشىن اقتاۋدان ءوزىمىزدىڭ قويما بازامىزدى سالساق پا دەگەن دە ويىمىز بار»، - دەدى قىتاي دەلەگاتسياسىنىڭ باسشىسى.

اقتاۋ پورتىنىڭ پرەزيدەنتى اباي تۇرىكپەنبايەۆ قىتاي دەلەگاتسياسىنىڭ وكىلدەرىن پورتتىڭ جوعارى دەڭگەيدە قىزمەت كورسەتە وتىرىپ، كونتەينەرلىك تاسىمالداردى جۇزەگە اسىرۋعا تولىقتاي دايىن ەكەنىن ايتتى.

كەزدەسۋ سوڭىنان تاراپتار ءبىر-بىرىنە ەستەلىك سىيلىقتار تاپسىردى.