وزبەكالى جانىبەكوۆكە العىس ايتار ەدىم - نيكولاي زايتسيەۆ

وسكەمەن. قازاقپارات - قازاقستانداعى العاشقى ەتنواۋىلدىڭ نەگىزىن قالاۋشىلاردىڭ ءبىرى، وسكەمەن قالاسىنىڭ قۇرمەتتى ازاماتى، ەڭبەگى سىڭگەن مادەني قىزمەتكەر نيكولاي زايتسيەۆ قازاق حالقىنا العىس ايتتى، دەپ حابارلايدى قازاقپارات ءتىلشىسى.

«قيىن-قىستاۋ زاماندا قازاقستان كوپتەگەن حالىقتىڭ وتانىنا اينالدى. قازىر دە مۇندا ءار ۇلت ەمىن-ەركىن ءومىر ءسۇرىپ جاتىر. قۇداي وسى بەرەكەمىزدەن ايىرماسىن. مەن جالپى ادامداردى ۇلتقا بولمەيمىن. ءبىراق قازاقتار جايلى مىنانى ايتقىم كەلەدى. ماڭايىمىزداعى ۋكراينا، مولدوۆا سياقتى وزگە دە ەلدەر قازاقستاننان ۇلگى السا ەكەن. قازاقتار وسى مەملەكەتتىڭ يەسى بولا تۇرىپ، تۇتاستىق پەن تاتۋلىقتى قامتاماسىز ەتۋدە. بۇل ۇلكەن قايىرىمدىلىق دەپ ايتۋعا بولادى. قازاقتاردى مەن باۋىرىمداي كورەم. ەگەر ناۋرىزدىڭ العاشقى كۇنىندە بىرەۋگە العىس ايتۋ كەرەك بولسا، مەن مارقۇم وزبەكالى جانبەكوۆ پەن توقان سامارقانوۆقا العىس ايتار ەدىم. ونداي مادەنيەت جاناشىرلارى نەكەنساياق. قازاق ۇلتى دەگەندە مەنىڭ ەسىمە ەڭ اۋەلى وسى ەكى ادام كەلەدى. جالپى قازاقتاردان كورگەن جاقسىلىعىم از ەمەس. راحمەت سىزدەرگە!» - دەيدى مادەنيەت سالاسىنىڭ ارداگەرى. بۇگىندە ول قۇرمەتتى ەڭبەك دەمالىسىندا.

ەسكە سالساق، جانىبەكوۆ قازاق حالقىنىڭ ۇلتتىق مادەنيەتىنىڭ، انا ءتىلىنىڭ، ءداستۇرى مەن ادەت-عۇرپىنىڭ جاڭارىپ، دامۋىنا ەلەۋلى ۇلەس قوستى. 20- عاسىردىڭ 70-جىلدارىنىڭ وزىندە-اق قوجا احمەت ياساۋي كەسەنەسىنىڭ قالپىنا كەلتىرىلۋىنە ۇيىتقى بولدى. جانىبەكوۆتىڭ باستاماسىمەن قازاقستاننىڭ كوپتەگەن قالالارىندا ەتنوگرافيالىق مۇراجايلار اشىلدى، قازاقستاننىڭ تاريحي جانە مادەني ەسكەرتكىشتەرىن ساقتاۋ مەن قالپىنا كەلتىرۋ ماقساتىن كوزدەگەن «ارقاس» قوعامى قۇرىلدى. جانىبەكوۆ «شەرتەر»، «ادىرنا»، «التىناي»، ت. ب. فولكلورلىق ونەر انسامبلدەرىن ۇيىمداستىردى. «ناۋرىز» مەيرامىنىڭ، م. دۋلات ۇلى، ج. ايماۋىت ۇلى، م. جۇماباي ۇلى، ش. قۇدايبەردى ۇلى ەسىمدەرىنىڭ حالقىنا قايتا ورالۋىنا بەلسەنە ات سالىستى. انا ءتىلىن دامىتۋ باعدارلاماسىنىڭ مەملەكەتتىك تۇجىرىمداماسىن جاساۋعا مۇرىندىق بولعان.

ايتا كەتەيىك، 1- ناۋرىز ەلباسى جارلىعىمەن العىس ايتۋ كۇنى دەپ جاريالانعان.

اۆتور: ەسىمجان ناقتىباي