العىس ايتۋ كۇنى: «استانا وپەرا» تىڭدارمانىن قالاي قۋانتپاق

استانا. قازاقپارات - كوكتەمنىڭ العاشقى كۇنىندە «استانا وپەرادا» العىس ايتۋ كۇنىنە ارنالعان «جۇرەكتەن كىرىپ بويدى الار» اتتى مەرەكەلىك كونسەرت وتەدى.

1 -ناۋرىزدا كامەرالىق زال ساحناسىندا قازاقستاندىق جارقىن مۋزىكانتتار تىڭدارماندارعا ءوز ونەرلەرىن پاش ەتەدى، دەپ حابارلايدى قازاقپارات.

«وسى كونسەرت ارقىلى ءبىز وتانداستارىمىزدى بارلىق قازاقستاندىقتار ءۇشىن ماڭىزدى بولىپ تابىلاتىن العىس ايتۋ كۇنىمەن قۇتتىقتاعىمىز كەلەدى. بۇل مەرەكە وتانىمىزدىڭ كەڭ- بايتاق دالاسىن مەكەندەگەن بارلىق ەتنوستى ودان ءارى جاقىنداستىرا تۇسەدى. العىس ايتۋ كۇنى - ۇلى وتانشىلدىق، دوستىق، مادەنيەتتەر سان الۋاندىعىنىڭ كۇنى. بۇگىن اربىرەۋىمىزدى ەلىمىز ءۇشىن ەرەكشە ماقتانىش سەزىمى كەرنەيدى»، - دەدى ورىنداۋشىلار.

بۇل كەشتە كەرەمەت مۋزىكانتتار، حالىقارالىق كونكۋرستاردىڭ لاۋرەاتتارى - «دارىن» مەملەكەتتىك جاستار سىيلىعىنىڭ يەگەرى اسقار دۇيسەنبايەۆ، ءمادينا بەكماديەۆا (سكريپكا)، قازاقستاننىڭ ەڭبەك سىڭىرگەن قايراتكەرى دامير سۇلتانوۆ (بايان) ، اناتوليي ياكۋشكين (كونتراباس)، ءالىبي اساقايەۆ (گيتارا)، دانا دۇيسەنبايەۆا (فورتەپيانو) ساحناعا شىعادى.

العىس ايتۋ كۇنى ەلىمىزدە ق ر پرەزيدەنتى نۇرسۇلتان نازاربايەۆتىڭ باستاماسىمەن 2016 -جىلى - قازاقستان حالقى اسسامبلەياسى قۇرىلۋىنىڭ 20 جىلدىعىندا جاريالانعان بولاتىن. اسسامبلەيا قۇرىلعان كۇنى «مەيىرىمدىلىكتىڭ، بۇكىل قازاقستاندىقتاردىڭ ءبىر-بىرىنە دەگەن دوستىعى مەن ماحابباتىنىڭ جارقىن مەرەكەسى» اتاپ وتىلەدى. رەسپۋبليكانىڭ ءار وڭىرىندە بۇل كۇنى كوپتەگەن ءىس-شارالار وتكىزىلەدى.

«استانا وپەرادا» وسى سالتاناتتى كۇنگە وراي حالىققا قازاق جانە باتىس ەۋروپالىق كلاسسيكا جاۋھارلارىنان تۇراتىن قانىق كونسەرتتىك باعدارلاما ۇسىنىلادى. ونىڭ ىشىندە ۇلى قازاق حالىق كومپوزيتورى قۇمانعازى ساعىرباي ۇلىنىڭ انسامبلگە ارنالىپ وڭدەلگەن «سارىارقا» جانە «تورەمۇرات» كۇيلەرى بار.

عاسىرلاردان بەرى كوشپەلى قازاقتىڭ ادال دوسى ءارى سەرىگى - ات بولىپ سانالعان. ە. برۋسيلوۆسكييدىڭ «بوزايعىر» سكريپكالىق پەساسىندا ۇلان- عايىر كەڭ دالادا جەلىگەن بوز ارعىماق - بوز ايعىردىڭ بەينەسى باتىلدىق پەن العا ۇمتىلۋشىلىقتىڭ نىشانى رەتىندە بەينەلەنەدى.

ك. سەن- سانستىڭ «ينترودۋكتسيا جانە روندو- كاپريچچيوزو» اتتى كەڭىنەن تارالعان پەساسى سكريپكالىق اسقان شەبەرلىك مۇمكىندىكتەرىن بارىنشا ءتۇسىنىپ جازىلعان، ال ونىڭ فورماسى تابيعي ءارى كورنەكى بولىپ تابىلادى. تىڭدارماندارعا فرانتسۋز كومپوزيتورىنىڭ «حاۆانەز» اتتى تاعى ءبىر شىعارماشىلىق ۇلگىسى ۇسىنىلادى.