كيىكتىڭ كيەسى

 استانا. قازاقپارات - كوكجيەكتى قىزعىلت تۇسكە بوياپ، قۇلانيەكتەنىپ تاڭ اتىپ كەلەدى ەكەن. دالانىڭ قىرمىزى گۇلدەرى مەن الۋان ءتۇرلى وسىمدىكتەرىن تاڭ سامالى تەربەتىپ تۇرعانداي...

 ىعى- جىعى قالىڭ جۇلدىزدار تاڭ جارىعى مولايعان سايىن كومەسكى تارتىپ بارادى. تۇنگى ماۋجىراعان ۇيقىدان ويانعان جان- جانۋار اتاۋى ءوز تىرلىكتەرىنە كىرىسىپ جاتىر.

اينالاسى جارقاباق بولىپ بىتكەن سور جاعاسىندا ءبىر توپ كيىك جايىلىپ ءجۇر. شەتكەرىرەك تۇرعان كارى تەكە اينالاعا كوز سالىپ، دەلديگەن قوس تاناۋىن جۋساننىڭ جۇپار يىسىنە بولەنگەن تاڭ سامالى ايالاپ، ءقاۋىپتىڭ جوقتىعىن سەزدىرگەندەي. ەندى عانا ويانىپ، انالارىنىڭ ۋىز سۇتىنە تويعان لاقتار ءبىر- بىرىمەن ءسۇزىسىپ، ويناقتاي شاۋىپ ءجۇر. كەنەت جاراسىمدى تابيعات تىرشىلىگىن گۇرىلدەگەن موتور ءۇنى مەن الىستان كوتەرىلگەن شاڭ بۇزدى. سپيدومەتر ءتىلى 160 تى كورسەتكەن «دجيپ» كولىگى تاڭعى تىنىشتىقتى جاڭعىرتا جۇيتكىپ كەلەدى. جىندى سۋعا بوگىپ، قىزارا بورتكەن ەكى جاس جىگىت ماگنيتوفون داۋىسىن بارىنشا شىعارىپ، كولىكتى ەلىرە ايداي ءتۇستى. قاۋىپتى سەزگەن كارى تەكەنىڭ بەلگىسىمەن قاشقان بوكەندەردى قۋا جونەلگەن كولىك جىلدامدىعىن ۇدەتە ءتۇستى. ءبىر كەزدە كولىك تەرەزەسىنەن قوس اۋىز مىلتىق كورىندى. اينالاسىنا اجال وعىن سەۋىپ، اتقىلاپ كەلەدى. مىلتىقتىڭ شۇرىپپەسىن باسىپ وتىرعان جاس جىگىتتىڭ ءتۇرى ادام شوشىرلىق. اتقان سايىن اقسيا كۇلىپ، تويىمسىز كوزدەرى قىزارىپ كەتكەن. بار قاۋىپتى ءبىر وزىنە بۇرعىسى كەلگەندەي كارى تەكە كولىكتىڭ الدىنان كەتەر ەمەس. وق تا دارىمايدى. اتقان سايىن وعى دالاعا كەتكەن جاس جىگىت ىزالانا ءتۇستى. وپتيكالىق كوزدەۋىشى بار مىلتىقتى قولىنا الدى. اسىقپاي كوزدەپ، تىنىسىن تەجەدى. جۇرەگىنىڭ سوعىسى جيىلەي تۇسكەندەي سەزىلدى. اتىپ كەلە جاتقان كۇننىڭ التىن شاپاعىمەن شاعىلىسقان قوس ءمۇيىزدىڭ ورتاسىنان كوزدەدى. گۇرس ەتكەن مىلتىقتىڭ ۇنىمەن بىرگە كارى تەكە دە اسپانعا شاپشي سەكىرىپ، وماقاسا قۇلادى. وسى كەزدە رۋلدە وتىرعان سەرىگىنىڭ جان ۇشىرا ايقايلاعانى قۇلاعىنا كەلىپ، دۇنيە استان- كەستەن بولىپ جۇرە بەردى. ءبىر قاراڭعىلىققا سۇڭگىپ كەتكەندەي...

قانشا جاتقانى بەلگىسىز، ۇيقىدان ويانعانداي كۇي كەشكەن اسىلحان كوزىن ارەڭ اشتى. ابدەن قارا تۇنەككە باتقان قوس جانارى جارىق ساۋلەگە ۇيرەنەر ەمەس. جامان ءتۇس كورگەندەي، دەنەسى سۋىق تەرگە مالشىنا تەرلەپتى. توسەكتە جاتقانىن ەندى سەزدى. جارىققا ەندى كوزى ۇيرەنگەندەي اينالاسىنا كوز جىبەردى. اۋرۋحانانىڭ جان ساقتاۋ بولىمىندە جالعىز ءوزى جاتىر. ءشول قىسقان ەرىندەرى كەزەرىپ، ءتىلى تاڭدايىنا جابىسىپ قالعان. تەك قوس جانارىنان پارلاي اققان جاستىڭ اشى ءدامى تىلىنە ءبىلىندى. جىلاپ جاتىر ەكەن. ورنىنان تۇرعىسى كەلىپ تالپىنىپ ەدى، اياق- قولى وزىنە باعىنبايدى. باعىنباق تۇگىلى قوزعالمايتىن سياقتى. تاسپەن باستىرىپ تاستاعانداي. اسىلحان اۋرۋحانادا ۇزاق جاتتى. دارىگەرلەر كولىك اپاتى سالدارىنان بەل ومىرتقاسىنا زاقىم كەلگەن دەگەن دياگنوز قويدى. اللا ءساتىن سالىپ، اجال تىرناعىنان امان قالعان ەدى. تەك ءبىر وكىنىشتىسى، جيىرما بەسكە ەندى عانا اياق باسقان جاس جىگىت قول ارباعا تاڭىلماق. كەۋدەسىنەن تومەن جان جوق. قاسىندا بولعان دوسى الىبەك ومىردەن وزىپتى. جاقىندا قىرىق كۇندىك اسى بەرىلمەك. بۇل جاعدايدى اۋرۋحاناعا كەلگەن اناسىنان ەستىدى. جان دۇنيەسى ورتەنىپ كەتكەندەي، جىلاپ جاتىر. بۇل - وكىنىشتىڭ كوز جاسى. - نەگە بۇلاي بولدى؟ - دەگەن سۇراق كوكەيىنەن كەتەر ەمەس. ۇيدەگى توسەگىندە جاتقان اسىلحاننىڭ قازىرگى جاعدايى ەش وزگەرىسسىز. ءبىر جىلدان اسسا دا اۋرۋىنا شيپا تابىلمادى.

 اتا- اناسى شىرىلداپ ءجۇرىپ قىتايعا دەيىن الىپ باردى. ءبىراق ەش ناتيجە جوق. الدىنا قويعان اسقا دا تابەتى شاپپاي، استى- ۇستىنە ءتۇسىپ جۇرگەن اتا- اناسىنا دا، باۋىرلارىنا دا ءتىس جارىپ سويلەگەن ەمەس. ءوزىنىڭ تۇڭعيىق ويىنا باتا بەرەدى.. . كوزىن جۇمسا بولدى كارى كيىكتىڭ بەينەسى كوز الدىنان كەتپەيدى. كوزىنە ەلەستەگەن سايىن بار دۇنيە استان- كەستەن بولىپ، قارا تۇنەك باسقانداي.

 - كيىكتىڭ كيەسى دەگەن وسى شىعار، وسى شىعار؟ ! - دەپ كۇبىرلەي بەردى...

قايرات جاقىپ باتىس قازاقستان وبلىسى، قازتالوۆ اۋدانى

Egemen.kz