قاتتى اۋىرعان شىمكەنتتىك قىز استانادا قايتىس بولدى

شىمكەنت. قازاقپارات - اۋىر دەرتپەن بەس جىل كۇرەسكەن شىمكەنتتىك ون جاستاعى لاۋرا ساعاتوۆا قايتىس بولدى، دەپ حابارلايدى قازاقپارات ءتىلشىسى.

 قىزدىڭ اناسى ايناگۇل ەلتايەۆانىڭ ايتۋىنشا، شىمكەنتتەگى قالالىق بالالار اۋرۋحاناسىنىڭ جانساقتاۋ بولىمىندە جاتقان قىز وتكەن كۇنى كوماعا تۇسكەن. كەشە كوزىن اشقانمەن تىم ءالسىز بولعان. ءتۇس قايتا شىمكەنتكە استانادان ساناۆياتسيا ۇشاعى جەتكەن.

«كەشكە قاراي ءبىزدى استاناداعى انا مەن بالا ورتالىعىنا الىپ كەتتى. جەتكەن بويدا قىزىمدى جانساقتاۋ بولىمىنە جاتقىزدى. بۇگىن تاڭعى 8-دە ونىڭ كوز جۇمعانىن ايتتى. دارىگەرلەردىڭ ايتۋىنشا، ارتىق مازالاماي، شىمكەنتتە قالدىرا بەرگەندە دۇرىس بولۋشى ەدى. ۇشاقپەن بەكەر ۇشتىق»، - دەيدى ايناگۇل ەلتايەۆا.

قازىر ءمايىتتى شىمكەنتكە قايتارۋ ماسەلەسى قاراستىرىلىپ جاتىر.

 ەسكە سالا كەتەيىك، قىز بەسكە تولعاندا اسقا زاۋقى بولماي، ارىقتاي باستاعان، 10 جاسىندا قىزدىڭ سالماعى نەبارى 11 ك گ ەدى. ونى ەمدەۋگە ناقتى دياگنوزدىڭ بولماۋى دا كەدەرگى جاساعان. كەزىندە تاشكەنتتىك دارىگەرلەر ناۋقاسقا تۇقىم قۋالايتىن ميتوحوندريالنايا ەنسەفالوميوپاتيا دياگنوزىن قويعانىمەن، قازاقستاندىق دارىگەرلەر ونى راستاماعان.

بالالار ومبۋدسمەنى زاعيپا باليەۆا كومەككە كەلگەن سوڭ قىزدىڭ وتباسىندا ونى شەتەلدە ەمدەۋ مۇمكىندىگى تۋدى. وكىنىشكە قاراي، قىزدىڭ اناسى وڭتۇستىك كورەياعا قۇجات جيناي باستاعان كەزدە لاۋرانىڭ جاعدايى كۇرت ناشارلاپ، 21 - اقپاندا جانساقتاۋ بولىمىنە جاتقىزىلعان.

فوتو: gorod55.ru