قۇسبەگىلەردىڭ «قانسونار» رەسپۋبليكالىق تۋرنيرى ءوتىپ جاتىر

ورال. قازاقپارات - باتىس قازاقستان وبلىسى ورال قالاسى ىرگەسىندەگى «جايىق قالاشىعى» ماڭىندا بۇگىن قۇسبەگىلەر اراسىندا «قانسونار» رەسپۋبليكالىق تۋرنيرى باستالدى، دەپ حابارلايدى «قازاقپارات» ءتىلشىسى.

ونىڭ اشىلۋ راسىمىنە قاتىسقان وبلىس اكىمىنىڭ ورىنباسارى عابيدوللا وسپانقۇلوۆ مۇنداي جارىستىڭ اقجايىق وڭىرىندە العاش رەت ۇيىمداستىرىلىپ وتىرعانىن جەتكىزدى.

«ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا سايكەس قازىرگىدەي جاھاندانۋ زامانىندا ۇلتتىق سالت-داستۇرلەردى، بابالارىمىزدان ميراس بولىپ كەلە جاتقان سپورت تۇرلەرىن دامىتۋدىڭ ماڭىزى زور. سونىڭ ءبىرى - قۇسبەگىلىك ونەر. بۇل ورايدا باتىس قازاقستاندا دا ءتيىستى جۇمىستار قولعا الىنۋدا»، دەدى ع. وسپانقۇلوۆ.

سونداي-اق ق ر ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى ەرلان وسپانوۆ، ۇلتتىق سپورت تۇرلەرىنەن مەملەكەتتىك جاتتىقتىرۋشى رامازان ساتتىبايەۆ جارىسقا قاتىسۋشىلارعا ساتتىلىك تىلەدى.

شارا ءوتىپ جاتقان جەرگە ءۇش كيىز ءۇي تىگىلگەن، ونىڭ بىرەۋىندە قولونەر شەبەرلەرىنىڭ بۇيىمدارى ساتىلۋدا. ەكىنشىسىندە وبلىستىق تاريحي- ولكەتانۋ مۋزەيىنىڭ جادىگەرلەرى قويىلعان. تاعى ءبىر ۇيدە باۋىرساق، كوجە تەگىن تاراتىلدى.

ەرتەڭ مارەگە جەتەتىن تۋرنيرگە رەسپۋبليكا وڭىرلەرىنەن 30-عا جۋىق قۇسبەگى قاتىسۋدا.

ازىرگە اقمولا، جامبىل، اتىراۋ وبلىستارىنىڭ وكىلدەرى ءساتتى ونەر كورسەتۋدە.