قازاقستاندا عۇلامالار كەڭەسىنىڭ ءرولى كۇشەيتىلمەك

استانا. قازاقپارات - ق ر ءدىن ىستەرى جانە ازاماتتىق قوعام مينيسترلىگى مەن قازاقستان مۇسىلماندارى ءدىني باسقارماسى بىرلەسىپ عۇلامالار كەڭەسىنىڭ ءرولىن كۇشەيتۋدى قولعا الىپ وتىر.

بۇل تۋرالى ق ر ءدىن ىستەرى جانە ازاماتتىق قوعام مينيسترلىگىنىڭ القا ماجىلىسىندە ءسوز سويلەگەن قازاقستان مۇسىلماندارى ءدىني باسقارماسىنىڭ نايب- مۋفتيى الاۋ ادىلبايەۆ ءمالىم ەتتى، دەپ حابارلايدى ۆەدومستۆانىڭ باسپا ءسوز قىزمەتى.

مەملەكەت پەن ءدىني باسقارما اراسىنداعى ءوزارا ارەكەتتەستىكتى كۇشەيتۋ ماقساتىندا 2017 -جىلعى 15- اقپاندا ق ر ءدىن ىستەرى جانە ازاماتتىق قوعام مينيسترلىگى مەن قازاقستان مۇسىلماندارى ءدىني باسقارماسى اراسىندا ءوزارا ىنتىماقتاستىق تۋرالى ەكى جاقتى كەلىسىمگە قول قويىلدى.

 قازاقستان مۇسىلماندارى ءدىني باسقارماسىنىڭ نايب- مۋفتيى اتالعان كەلىسىم بويىنشا ءبىرقاتار شارالاردىڭ بىرلەسىپ جۇزەگە اسىرىلىپ جاتقاندىعىن اتاپ ءوتتى.

«اتاپ ايتقاندا، بىرىنشىدەن، عۇلامالار كەڭەسىنىڭ ءرولىن كۇشەيتۋ. كەڭەس تەك ءدىني سۇراقتاردى عانا ەمەس، سونداي- اق جالپى ومىرلىك، الەۋمەتتىك، مادەني ماسەلەلەردىڭ شەشىمدەرىن قابىلداۋ ءۇشىن جان- جاقتى تالقىلاۋ جۇمىستارىن جۇرگىزۋدە. كەڭەستىڭ قۇرامىنا بىلىكتى يمامدار، ەلدىڭ تانىمال ءدىن ماماندارى مەن تەولوگتارى كىرەدى»، - دەدى نايب- مۋفتي.

الاۋ ادىلبايەۆتىڭ ايتۋىنشا، عۇلامالار كەڭەسىنىڭ قۇرامىنا مينيسترلىككە قاراستى مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى ا. ابۋوۆ قوسىلدى. وسىلايشا، كەڭەس شارعي ۇكىمدەردى شىعارۋ بارىسىندا مەملەكەتىڭ ءدىن سالاسىنداعى باعىتىمەن ۇيلەسىمىن تابۋىنا دا ءمان بەرۋدە.

سونىمەن قاتار، قازاق حالقى ءۇشىن ءداستۇرلى يسلامنىڭ نەگىزدەرىن قالىپتاستىرىپ، ءدىني وقۋ- اعارتۋ جۇمىسىن جەتىلدىرۋ ماقساتىندا «ءدىن مەن ءداستۇر جىلى»، «ءدىن جانە تاريح تاعىلىمى جىلى»، ءدىني باسقارمانىڭ جۇمىس بارىسىنداعى ستراتەگيالىق ءتورت باعىتى، ق م د ب- نىڭ 2020 -جىلعا دەيىنگى ءدىني ءبىلىم بەرۋدى دامىتۋ تۇجىرىمداماسى، ق م د ب- نىڭ 2020 -جىلعا دەيىنگى ستراتەگيالىق دامۋ تۇجىرىمداماسى، «21 - عاسىردىڭ ۇزدىك زياتكەر يمامى»، «500 ۇزدىك اعارتۋشى يمام»، ق م د ب مەشىتتەرىنىڭ ءتارتىپ ەرەجەسى، 1، Ⅱرەسپۋبليكالىق يمامدار فورۋمى، ت. ب. جوبالار جۇزەگە اسىرىلدى.

سونىمەن قاتار، نايب- ءمۇفتي قازاقستاندىق يسلامتانۋ مەكتەبىن قالىپتاستىرۋ ماقساتىندا «قازاقستانداعى يسلامتانۋ: تاريحى، ءداستۇرى، دامىتۋ جولدارى» اتتى جوبا دايىندالىپ جاتقانىن ايتتى.

«بۇل كەشەندى عىلىمي جوبانى جۇزەگە اسىرۋعا بىلىكتى ماماندار تارتىلاتىن بولادى. جوبانىڭ نەگىزگى ماقساتى: ءداستۇرلى يسلام تۇسىنىگى مەن ۇلتتىق مادەنيەتتىڭ ءوزارا ىقپالداستىعىنىڭ الاتىن ورنىن، بۇرىنعى تاريحي كەزەڭدەردەگى ۇلتتىق يدەيانىڭ قالىپتاسۋى مەن دامۋىنداعى ءرولىن، ءدىن قايراتكەرلەرىنىڭ يدەولوگيالىق ۇستانىمدارىنىڭ مەملەكەتپەن ءوزارا بايلانىسىن جانە ءداستۇرلى مۇسىلمان قازاق قوعامىنىڭ ۇلتتىق تۇتاستىعىن قالىپتاستىرۋداعى وزىندىك ورنىن انىقتاۋ بولىپ تابىلادى»، - دەدى ا. ادىلبايەۆ.