سمارتفوندى ەندى اۋامەن قۋاتتاندىرۋعا بولادى

None
None
 استانا. قازاقپارات - امەريكالىق عالىمدار اتموسفەرادان ەلەكتر قۋاتىن وندىرە الاتىن قۇرىلعىنى ويلاپ تاپتى. بۇل تۋرالى ەرەكشە قۇرىلعى ازىرلەنگەن ماسساچۋسەتس تەحنولوگيالىق ينستيتۋتىنىڭ سايتى حابارلايدى.

زەرتتەۋشىلەردىڭ ايتۋىنشا، اپپارات اۋا تەمپەراتۋرانىڭ كۇندەلىكتى تەربەلۋى اسەرىنەن جۇمىس ىستەيدى. ماسەلەن، كۇندىزگى جانە تۇنگى اۋا تەمپەراتۋراسىنىڭ ايىرماشىلىعى 10 گرادۋس سەلسي بولعان كەزدە ول 1,3 ميلليۆات ەنەرگيا جانە 350 ميلليۆولت قۋات وندىرەدى. بۇل قاراپايىم داتچيكتەر مەن بايلانىس قۇرالدارىنىڭ جۇمىسىن قامتاماسىز ەتۋگە تولىعىمەن جەتكىلىكتى.

 قۇرىلعى ءۇستى گرافەن قاباتىمەن قاپتالعان جانە ارنايى بالاۋىز تولتىرىلعان مىس پەن نيكەلدىڭ مەتالل كوبىگىنەن تۇرادى. ناتيجەسىندە اپپاراتتىڭ ءبىر جاعى جىلۋ ءبولىپ شىعارادى، ال ەكىنشى جاعى ونى جيناقتايدى. عالىمداردىڭ مالىمدەۋىنشە، تەمپەراتۋرانىڭ وسىنداي تەربەلۋى ەلەكتر ەنەرگياسىن وندىرۋگە مۇمكىندىك بەرەدى.

زەرتتەۋشىلەر تەرميالىق رەزوناتوردىڭ جاڭا جۇيەسى ەنەرگيانىڭ باسقا كوزدەرىن نەمەسە باتارەيالاردى پايدالانۋدى تالاپ ەتپەستەن، قاشىقتىقتان زوندتاۋ جۇيەسىنىڭ كوپ جىل بويى ۇزدىكسىز جۇمىس ىستەۋىن قامتاماسىز ەتە الاتىندىعىنا سەنىمدى.

سوندىقتان، عالىمدار بولاشاقتا اپپاراتتىڭ قۋاتىن ارتتىرىپ، سمارتفونداردى قوسا العاندا موبيلدىك قۇرىلعىلاردى قۋاتتاندىرۋ مۇمكىندىگىن قامتاماسىز ەتۋدى جوسپارلاپ وتىر. بولاشاقتا تەرمالدى رەزوناتور شالعاي وڭىرلەرلەردى ەلەكترلەندىرۋگە، سونداي- اق عارىشكەرلەردى ەلەكتر ەنەرگياسىمەن قامتاماسىز ەتۋگە مۇمكىندىك بەرەدى.

سوڭعى جاڭالىقتار