دەپۋتاتتار قىزىلوردا مەن قوستانايدىڭ ۋاقىتىن اۋىستىرۋدى سۇرادى
وسىعان وراي، ءبىر توپ دەپۋتاتتار ق ر پرەمەر- ءمينيسترى باقىتجان ساعىنتايەۆتىڭ اتىنا ساۋال جولدادى، دەپ حابارلايدى قازاقپارات ءتىلشىسى.
ونىڭ ايتۋىنشا، وڭىرلەردى ارالاۋ كەزىندە قىزىلوردا وبلىسىنىڭ تۇرعىندارى جەرگىلىكتى ۋاقىتتى ەسەپتەۋ ءتارتىبىن وزگەرتۋ ماسەلەسىن تاعى كوتەردى. «بۇل ماسەلەنى وبلىس حالقى 2005 -جىلدان باستاپ، ياعني قىزىلوردا مەن قوستاناي وبلىستارىنىڭ ۋاقىت ولشەمىن داعدىلى ۋاقىتىنان العا جىلجىتۋ تۋرالى شەشىم قابىلدانعاننان بەرى كوتەرىپ كەلەدى. ءماجىلىس جانە سەنات دەپۋتاتتارى بۇعان دەيىن اتالعان ماسەلەنى ۇكىمەت الدىنا دەپۋتاتتىق ساۋال رەتىندە بىرنەشە رەت قويعان بولاتىن. ۇكىمەتتەن ءتيىستى زەرتتەۋ جۇمىستارى جۇرگىزىلەدى دەگەن جاۋاپ الىندى. ءبىراق ءالى كۇنگە دەيىن ناقتى شەشىم قابىلدانعان جوق»، - دەدى ب. كەسەبايەۆا.
ونىڭ سوزىنە قاراعاندا، فەسەنكوۆ اتىنداعى استروفيزيكالىق ينستيتۋتىنىڭ اقپاراتى بويىنشا قىزىلوردا وبلىسىنىڭ تەرريتورياسى ءتورتىنشى ساعاتتىق بەلدەۋگە جاتادى جانە قازىرگى دەكرەتتىك ۋاقىتتان 2 ساعات 30 مينۋتقا الدا كەلەدى.
«ال عالىمداردىڭ زەرتتەۋىنە سايكەس، ۋاقىت بەلدەۋىنەن ءبىر ساعات الدا ءجۇرۋ ادام ورگانيزمىندەگى بيولوگيالىق ءريتمنىڭ وزگەرۋىنە اكەلىپ سوقتىرادى. مۇنداي وزگەرىستىڭ ناتيجەسى دەپرەسسياعا، پسيحولوگيالىق اۋرۋلارعا، سۋيتسيدتىك مىنەز- قۇلىققا، سونداي- اق دەسينحرونوزعا، جۇيكە جۇيەسى مەن ونكوولوگيالىق اۋرۋلارعا سەبەپ بولىپ جاتادى. اسىرەسە، ەگدە جاستاعى جانە بالالارعا تەرىس ىقپال تيگىزۋدە. مەكتەپكە دەيىنگى جانە مەكتەپ جاسىنداعى بالالار تابيعي ۋاقىتتان ەرتە ۇيقىلارىنان تۇرىپ، تاۋلىكتىڭ قاراڭعى ۋاقىتىندا وقۋ مەكەمەسىنە بارۋعا ءماجبۇر. بۇل دەنساۋلىقپەن قاتار ساباق ۇلگەرىمىنە دە تەرىس اسەر ەتۋدە. ۇقساس ماسەلە قوستاناي وبلىسىندا دا بار ەكەن. بۇل وڭىردە دە ادامداردىڭ دەنساۋلىققا زيان تيگىزەتىن بيوريتممەن كۇرەسىپ وتىرعانىنا نازار اۋدارۋ قاجەت»، - دەدى ب. كەسەبايەۆا.
دەپۋتاتتىڭ ايتۋىنشا، اتالعان ماسەلەنى شەشۋ ءۇشىن قارجى قاجەت ەمەس. دەگەنمەن، قىزىلوردا مەن قوستانايدىڭ ۋاقىتىن رەتكە كەلتىرۋ پروبلەماسى سوزبالاڭعا سالىنىپ وتىر.
