جاپون فيلوسوفياسى: يكيگاي دەگەن نە؟

 استانا. قازاقپارات - يكيگاي ءسوزى جاپون تىلىنەن شىققان. ماعىناسى - تاڭەرتەڭ ويانۋعا ماجبۇرلەيتىن ءومىر ءمانى.

 يكيگاي -  ءسىزدىڭ قىزىعۋشىلىقتارىڭىز بەن سىزگە قۋانىش سىيلايتىن ارەكەتتىڭ تولىق جيىنتىعىن بىلدىرەتىن شىعىس ازيا تەرمينى. وكيناۆا ارالىنىڭ تۇرعىندارى (جاپوندار) بۇل ءسوزدى ءوز فيلوسوفيالارىنىڭ ءبىر بولىگىنە اينالدىرعان. بۇل ءسوز باتىس مادەنيەتى مەن ورتا ازيادا تاڭسىق دەۋ دە دۇرىس ەمەس. ويتكەنى، ءوز ومىرلەرىندە بەلەستەردى باعىندىرعاندار اراسىندا بۇل فيلوسوفيا نەگىزىندە ءومىر سۇرگەندەر كوپ:

 • «جۇمىسقا كىرىسۋ ءۇشىن تاڭدى اسىعا كۇتەتىنبىز» (ۋيلبۋر رايت -  ۇشاقتى ويلاپ تاپقان ادام) • «ءوزىڭىزدىڭ سۇيىكتى ىسىڭىزبەن اينالىسىڭىز. بۇل ءسىزدى جەتىستىككە اكەلەدى. ءار تاڭ سايىن ايناعا قاراپ، وزىمنەن سۇرايتىنمىن: ەگەر بۇگىن ومىرىمدەگى سوڭعى كۇن بولسا، مەن نە ىستەر ەدىم؟ » ستيۆ دجوبس -  Apple نەگىزىن قالاۋشى

ومىرگە دەگەن قىزىعۋشىلىق، ءوز ىسىنە دەرەۋ كىرىسسەم دەگەن قۇمارلىق ادامعا ءىستى تياناقتى ورىنداۋعا مۇمكىندىك بەرىپ قانا قويماي، ءوزىنىڭ ماڭىزدىلىعىن ۇعىنىپ، راحاتتانۋ سەزىمىن باستان كەشىرۋگە جاعداي جاسايدى. ءوزىنىڭ يكيگايىن بىلەتىن ادامدارعا كۇيزەلىس ۇعىمى تاڭسىق. سوندىقتان، ۇزاق ءارى ءماندى ءومىر ءسۇرۋدى قالايتىن ادامعا تاڭەرتەڭ ۇيقىدان وياتاتىن سەبەپ تابۋ كەرەك. ءوز يكيگايىن قالاي تابادى؟ ومىردەگى باستى ميسسياڭىزدى ورىنداۋ ءۇشىن سىزدەن ۋاقىت پەن كۇش- قۋات كەرەگى انىق. سىزگە تاڭداۋ جاساۋعا تۋرا كەلەدى. بەلگىلى ءبىر نارسەدەن باس تارتىپ، ومىردەگى باسپالداقتى قايتا جۇرۋگە ءتيىستى بولاسىز. ءسىز دايىنسىز با؟ نەعۇرلىم ءوز يكيگايىڭىزدى ىزدەۋدى ەرتەرەك باستاساڭىز، سوعۇرلىم ەرتەرەك ءسىز تىنىشتىق پەن راحاتتانۋدى سەزىنە الاسىز. ىزدەۋ بارىسىندا سەپتىگىن تيگىزەتىن سۇراقتار رەتىن ۇسىنامىز:

 • جەتىستىك: ومىرىڭىزدەگى قاي جەتىستىگىڭىز ءسىز ءۇشىن باعالى؟ اق پاراق الىڭىز دا، شىنىمەن ماقتان تۇتاتىن بىرنەشە جەتىستىگىڭىزدى جازىپ شىعىڭىز.

 • ءبىلىم: بويىڭىزداعى ءبىلىم مەن داعدىلار نەسىمەن ەرەكشە؟ ءوزىڭىزدى قاي سالادا مامان سانايسىز؟ قاي تاقىرىپتا راحاتتانا اڭگىمە ايتاسىز؟ قاي جانرداعى ادەبيەتتى وقيسىز؟ بوس ۋاقىتىڭىزدا قاي سايتقا كىرەسىز؟

 • سەزىم: ءوزىڭىزدىڭ قىزىعۋشىلىعىڭىزعا سايكەس كەلەتىن باعىت بويىنشا جۇمىس ىستەيتىن بولساڭىز، جەتىستىككە جەتەسىز. يكيگاي ىسكەرلىك جەتىستىكتەردەن گورى، جۇرەك تىنىشتىعىنا كوبىرەك كوڭىل بولەدى.

 • ءوزىن- ءوزى باعالاۋ: ارمانىڭىزداعى بەينەڭىز قانداي؟ ءسىز كىمسىز؟ قانداي بولۋعا تىرىسىپ ءجۇرسىز؟

 • تۇلعا: ومىردە بىردەي ادام جوق. ءتىپتى، ءبىر- بىرىنە قاتتى ۇقسايتىن ەگىزدەردىڭ مىنەزى ءار ءتۇرلى. وزىڭىزگە ءتان قاسيەتتەرىڭىز بار ما؟ ول ءسىزدى وزگەلەردەن نەسىمەن ەرەكشەلەندىرەدى؟

وسى سۇراقتارعا ساۋاپ بەرە وتىرىپ، ومىردەن ءوز يكيگايىڭىزدى تاباتىن شىعارسىز. تاڭەرتەڭ ۇيقىڭىزدان ەرىكسىز وياتاتىن، ءومىرىڭىزدىڭ ءمانىن تاپقان شاقتا جۇرەگىڭىز دە ءوز باقىتىن جولىقتىرادى.

Massaget.kz