قاجەتسىز مەشىت عيماراتتارى ساتىلىپ جاتىر - ەرمەكبايەۆ
«كەيدە مەشىت سالۋ ءسانقويلىق بولىپ سانالادى. ال مەشىتتىڭ يمامى بولماۋى نەمەسە ونى ۇستاپ تۇرۋدىڭ جەرگىلىكتى حالىققا اۋىر تيەتىنى نازارعا الىنبايدى. سالدارىنان كەي جەرلەردە مەشىت عيماراتتارى ءتىپتى ساتىلىمعا قويىلىپ جاتىر»، - دەدى نۇرلان ەرمەكبايەۆ ۆەدومستۆونىڭ كەڭەيتىلگەن القا وتىرىسىندا.
مينيستر يگى امالداردىڭ تەك مەشىت سالۋمەن عانا شەكتەلمەيتىنىن باسا ايتتى.
«بۇگىندە ەلىمىزدە 3601 مەشىتتىڭ 84- ءى قاڭىراپ بوس تۇر. بۇل پروتسەستى جۇيەگە كەلتىرۋ ءۇشىن ءدىني عيباداتحانالار سالۋعا رۇقسات بەرەتىن ايقىن ستاندارتتار بولۋى قاجەت. سونىڭ ىشىندە، جاڭادان قۇرىلىس سالۋعا نيەتتى ازاماتتارعا قوسىمشا تالاپتار قويىلۋى مۇمكىن. مىسالى، عيباداتحانا سالۋدىڭ جاڭا ۇلگىلى ەرەجەلەرىن ەنگىزۋ»، - دەپ ءسوزىن تولىقتىردى ول.
ن. ەرمەكبايەۆ عيباداتحانالاردىڭ، ونىڭ ىشىندە مەشىتتەردىڭ قۇرىلىسىن تارتىپكە كەلتىرەتىن ۋاقىتتىڭ جەتكەنىن ايتتى.
«مۇسىلمان ءۇشىن مەشىت - اللانىڭ ءۇيى، ول تازا جانە كۇتىلگەن بولۋى كەرەك. ونىڭ كەلۋشى جاماعات سانىنا سايكەس بولۋى، ينفراقۇرىلىممەن قامتاماسىز ەتىلۋى، اينالاسىنا كەدەرگى كەلتىرمەۋى ابزال. ماسەلەن، مەشىت نەمەسە شىركەۋ قاراۋسىز قالسا، كەلۋشى جاماعات از بولسا، حالىق كوپ جۇرەتىن كوشەنىڭ بويىنا سالىنىپ، ءبىراق كولىك قوياتىن ورىندارمەن قامتاماسىز ەتىلمەسە، ەگەر داۋىسى قاتتى شىعاتىن دىبىستار نەمەسە قوڭىراۋلار اينالاداعى تۇرعىنداردىڭ مازاسىن السا، مۇنداي قۇبىلىس جاعىمدى سەزىمدەردى ەمەس، تەك شاعىمداردى كوبەيتەدى. وكىنىشكە قاراي، مۇنداي شاعىمدار بىزگە كەلىپ تۇسۋدە»، - دەيدى مينيستر.
ن. ەرمەكبايەۆتىڭ ايتۋىنشا، جاقىن پەرسپەكتيۆادا مينيسترلىكتىڭ ءدىن سالاسىندا كوپتەگەن مىندەتتەرى بار. ولاردى جۇزەگە اسىرۋ ءدىن سالاسىنداعى قارىم- قاتىناستاردىڭ ۇيلەسىمدى بولۋىنا وڭ ىقپالىن تيگىزبەك.
اۆتور: ايجان سەرىكجان قىزى
